Sunday, November 8, 2026 12:50 pm
அரசியல் கட்சிகளுடன் நடத்திய ஆலோசனைகளுக்குப் பிறகு, ‘யாஷார்’ கட்சியின் தலைவர் காடி ஐசென்கோட்டிடம் புதிய அரசாங்கத்தை அமைக்கும் பொறுப்பை ஒப்படைக்கப்போவதாக இஸ்ரேலிய ஜனாதிபதி ஐசக் ஹெர்சாக் சனிக்கிழமை மாலை அறிவித்தார்.
ஜனாதிஅப்தி அலுவலகம் வெளியிட்டுள்ள அறிக்கையின்படி, ஞாயிற்றுக்கிழமை மாலை 5 மணிக்கு ஜனாதிபதி இல்லத்திற்கு வருமாறு ஐசென்கோட்டிற்கு அழைப்பு விடுக்கப்பட்டுள்ளது; அங்கு அவர் அரசாங்கத்தை அமைப்பதற்கான அதிகாரப்பூர்வ ஆணையைப் பெற்றுக்கொள்வார்.
இந்த அறிவிப்பைத் தொடர்ந்து, ‘எக்ஸ்’ (X) சமூக ஊடகத் தளத்தில் கருத்து தெரிவித்துள்ள ஐசென்கோட், “இது ஒரு தேசிய அவசரகால அரசாங்கத்தை அமைப்பதற்கான தருணம். இந்த பொறுப்பிற்கு நாங்கள் தகுதியானவர்கள் என்பதை நிரூபிக்க என்னால் இயன்ற அனைத்தையும் செய்வேன்” என்று குறிப்பிட்டுள்ளார்.
இஸ்ரேலிய சட்டப்படி, முன்னாள் இராணுவத் தளபதியான ஐசென்கோட்டிற்கு, ஆளும் கூட்டணியை உருவாக்க 28 நாட்கள் அவகாசம் அளிக்கப்படும். தேவைப்பட்டால், அதிபரிடம் மேலும் 14 நாட்கள் கால நீட்டிப்பைக் கோர அவருக்கு வாய்ப்பு உண்டு.
அவர் அரசாங்கத்தை அமைக்கத் தவறினால், ஜனாதிபதி ஹெர்சாக் வேறொரு வேட்பாளரிடம் இந்தப் பொறுப்பை ஒப்படைக்கலாம். அல்லது, 120 இடங்களைக் கொண்ட பாராளுமன்றத்தில் குறைந்தது 61 உறுப்பினர்கள் ஒன்றிணைந்து, தங்களுக்கு விருப்பமான ஒரு வேட்பாளரிடம் இந்தப் பொறுப்பை ஒப்படைக்குமாறு ஜனாதிபதியிடம் கோரலாம். இந்த முயற்சிகளும் தோல்வியடைந்தால், பாராளுமன்றம் கலைக்கப்பட்டு, நாட்டில் புதிய தேர்தல்கள் நடத்தப்படும்.
ஜனாதிபதி ஹெர்சாக்கிடம் சமர்ப்பிக்கப்பட்ட பரிந்துரைகளின்படி, எதிர்க்கட்சி கூட்டணியைச் சேர்ந்த 48 பாராளுமன்ற உறுப்பினர்களும், அரபு கட்சிகளைச் சேர்ந்த 19 பிரதிநிதிகளும் ஐசென்கோட்டிற்கு ஆதரவு தெரிவித்துள்ளனர்.
தற்போதைய பிரதமர் பெஞ்சமின் நெதன்யாகுவிற்கு 46 பாராளுமன்ற உறுப்பினர்கள் ஆதரவு தெரிவித்தனர். அதேசமயம், தீவிர மதப்பற்றுள்ள ‘யுனைடெட் தோரா ஜூடாயிசம்’ கட்சியைச் சேர்ந்த 7 உறுப்பினர்கள், எந்த வேட்பாளருக்கும் ஆதரவு தெரிவிக்க மறுத்துவிட்டனர். பெரும்பாலான பரிந்துரைகளைப் பெற்றிருந்தபோதிலும், அரபு கட்சிகளுடனான ஒத்துழைப்பு குறித்த எதிர்க்கட்சிக்குள்ளான பிளவுகள் மற்றும் இணைந்து 13 இடங்களைக் கொண்டுள்ள இரண்டு தீவிர பழமைவாத கட்சிகளுடனான கருத்து வேறுபாடுகள் காரணமாக, 61 இடங்களைக் கொண்ட பெரும்பான்மை அரசாங்கத்தை அமைப்பதில் ஐசன்கோட் ஒரு சவாலான பாதையை எதிர்கொள்கிறார் என்று ஆய்வாளர்கள் கூறுகின்றனர்.
