Sunday, November 8, 2026 12:55 pm
மத்திய ஜப்பானில் ஞாயிற்றுக்கிழமை அதிகாலை 5.7 ரிக்டர் அளவிலான நிலநடுக்கம் ஏற்பட்டது. இதில் ஐச்சி , ஷிஜுவோகா ஆகிய மாகாணங்களில் 20க்கும் மேற்பட்டோர் காயமடைந்ததாக அதிகாரிகள் தெரிவித்தனர்.
அதிகாலை 1:04 மணிக்கு ஏற்பட்ட இந்த நிலநடுக்கம், ஷிஜுவோகா மாகாணத்தின் மேற்குப் பகுதியில் சுமார் 40 கிலோமீற்றர் ஆழத்தில் உருவானது. ஜப்பானிய வானிலை ஆய்வு மையத்தின்படி, ஐச்சியின் சிட்டா பகுதியில் ஜப்பானிய நில அதிர்வு தீவிர அளவுகோலில் இது 5-இன் மேல் மட்டத்தில் பதிவானது. சுனாமி எச்சரிக்கை எதுவும் விடுக்கப்படவில்லை.
டொயோட்டா மோட்டார் கார்ப்பரேஷன் போன்ற உற்பத்தியாளர்களின் தாயகமான ஐச்சியில், கடந்த சுமார் மூன்று தசாப்தங்களில் ஏற்பட்ட மிகப்பெரிய நிலநடுக்கம் இதுவாகும். இதற்கு முன்னர் 1997-ல் இந்த மாகாணத்தில் 5-க்கும் மேற்பட்ட ரிக்டர் அளவிலான நிலநடுக்கம் பதிவு செய்யப்பட்டுள்ளது.
5-க்கும் மேற்பட்ட ரிக்டர் அளவில், பெரும்பாலான மக்கள் எதையாவது பிடித்துக்கொள்ளாமல் நடப்பது கடினமாக இருக்கும், மேலும் நிலையாகப் பொருத்தப்படாத தளபாடங்கள் கவிழ்ந்து விழக்கூடும். அதேசமயம், 5-க்கும் குறைவான ரிக்டர் அளவில், தட்டுகள் மற்றும் புத்தகங்கள் போன்ற பொருட்கள் அலமாரிகளில் இருந்து கீழே விழக்கூடும்.
ஷிசுவோகாவில் உள்ள ஹமாவோகா அணுமின் நிலையத்தில் எந்த அசாதாரணங்களும் கண்டறியப்படவில்லை என்று அதன் இயக்குநரான சுபு எலக்ட்ரிக் பவர் நிறுவனம் தெரிவித்துள்ளது.இந்த அணுமின் நிலையம், நான்காய் பள்ளத்தில் ஏற்படக்கூடிய ஒரு மாபெரும் நிலநடுக்கத்தின் கணிக்கப்பட்ட மூலப் பகுதிக்கு அருகில் அமைந்துள்ளது.
சில உள்ளூர் ரயில் சேவைகள் நிறுத்தப்பட்டன. பாதுகாப்புக் காரணங்களுக்காக டோகைடோ ஷின்கான்சென் அதிவேக ரயில்கள் வழக்கத்தை விட மெதுவான வேகத்தில் இயக்கப்பட்டதால், ஷிஜுவோகா மற்றும் கிஃபு-ஹாஷிமா நிலையங்களுக்கு இடையே தாமதம் ஏற்பட்டது. இருப்பினும், நண்பகலுக்கு முன்பே ரயில்கள் இயல்பு வேகத்திற்குத் திரும்பின என்று ஜே.ஆர். சென்ட்ரல் தெரிவித்துள்ளது.
