Sunday, September 20, 2026 1:17 pm
பிரான்ஸ் நாட்டைச் சேர்ந்த ஜூடோ நட்சத்திரம் டெடி ரைனர், 2028ல் லொஸ் ஏஞ்சல்ஸில் நடைபெறவுள்ள ஒலிம்பிக் போட்டிகளில் தனது நான்காவது தனிநபர் தங்கப் பதக்கத்தை வென்று, தனது சிறப்பான விளையாட்டு வாழ்க்கையை நிறைவு செய்ய விரும்புகிறார்.
2.04 மீற்றர் உயரமும் அதிக உடல் எடையும் கொண்ட இவர், அப்போது 39 வயதை எட்டியிருப்பார். தகுதி பெற்றால், இதுவே அவரது ஆறாவது , கடைசி ஒலிம்பிக் போட்டியாக அமையும்.
11 முறை உலக சம்பியனான டெடி ரைனர், வலது தோள்பட்டையில் நீண்ட நாட்களாக உள்ள காயம் காரணமாக, அடுத்த மாதம் பாகு (Baku) நகரில் நடைபெறவுள்ள உலக சம்பியன்ஷிப் போட்டியில் பங்கேற்க முடியாத நிலை ஏற்பட்டுள்ளது.
டோக்கியோ ஒலிம்பிக்கில் வெண்கலப் பதக்கம் வென்ற பிறகு, 2024 பரிஸ் ஒலிம்பிக்கில் மீண்டும் தங்கப் பதக்கத்தை வென்ற ரைனர், ஜூடோ வரலாற்றில் தனிநபர் பிரிவில் மூன்று முறை தங்கம் வென்ற இரண்டாவது வீரர் என்ற சாதனையைப் படைத்தார்.
ரைனர் 2008 பீஜிங் ஒலிம்பிக்கில் தனது முதல் வெண்கலப் பதக்கத்தை வென்றார்; மேலும் தனிநபர் போட்டிகளில் ஐந்து ஐரோப்பிய சம்பியன் பட்டங்களையும் அவர் வென்றுள்ளார். 2010 முதல் 2020 வரையிலான காலகட்டத்தில், ஜப்பானின் கொகோரோ ககேயுராவிடம் தோல்வியடையும் வரை, அவர் தொடர்ந்து 154 வெற்றிகளைக் குவித்து வியக்கத்தக்க சாதனை படைத்தார்.
ரைனர் இதற்கு முன்பு 1994 முதல் 2007 வரை PSG ஜூடோ கிளப்பிற்காகப் போட்டியிட்டார், பின்னர் 2017-ல் மீண்டும் அதில் இணைந்தார். ஒலிம்பிக் வெற்றியைத் தொடர்ந்து, 2024-ஆம் ஆண்டுக்கான ஜூடோ சம்பியன்ஸ் லீக் பட்டத்தை PSG வெல்ல அவர் உதவினார்; 2027-லும் அந்த அணி மீண்டும் வெற்றிபெற உதவத் திட்டமிட்டுள்ளார்.
