Thursday, November 20, 2025 3:05 pm
நாட்டில் கல்விப் பொது தராதரா உயர்தரப் பரீட்சை நடைபெற்று கொண்டிருக்கும் நிலையில், மாணவர்கள் எழுதிய விடைத்தாள்களை திருத்தும் பணிக்கு அனுப்பாது கவனக்குறைவாக செயற்பட்ட விடயம் யாழ்ப்பாணத்திலுள்ள நெல்லியடி பிரபல பாடசாலையொன்றில் இடம்பெற்றுள்ளது.
நெல்லியடியில் உள்ள பிரபல பாடசாலையில் அமைக்கப்பட்ட உயர்தரப் பரீட்சை மத்திய நிலையத்தில் உயிரியல் பாடத்தை எழுதிய 21 மாணவர்களின் முதலாம் பகுதிக்கான (பல்தேர்வு வினா) விடைத்தாள்களே இவ்வாறு திருத்தும் பணிகளுக்காக அனுப்பப்படாமல் தவறவிடப்பட்டுள்ளன.
21 மாணவர்கள் பரீட்சையில் தோற்றி முறைப்படி விடைத்தாள்களைக் கையளித்துள்ளனர். அன்றைய தினமே உரிய பாதுகாப்புகளுடன் திருத்தல் பணிகளுக்காக அனுப்பப்பட வேண்டிய விடைத்தாள்கள் அதிகாரிகளின் அசமந்தத்தினால் அனுப்பாது விடப்பட்டள்ளது.
குறித்த விடயம் கல்வித் திணைக்களங்களின் கவனத்துக்குக் கொண்டு செல்லப்பட்ட நிலையில் அந்தப் பரீட்சை மத்திய நிலையத்தில் கடமையாற்றியவர்கள் அங்கிருந்து உடனடியாக நீக்கப்பட்டுள்ளனர். கவனக்குறைவாக செயற்பட்டவர்களுக்கு எதிராக திணைக்கள ரீதியான விசாரணைகளும் ஆரம்பிக்கப்பட்டுள்ளன.
உயர்தரப் பரீட்சையில் மாணவர்களின் புள்ளிகளை தீர்மானிக்கும் விடயத்தில் பல்தேர்வு வினாப்பகுதி பெருமளவில் பங்களிப்பு செய்கின்றன. அதிகாரிகளின் கவனக்குறைவான செயற்பாடு மாணவர்களின் இத்தனை ஆண்டுகால கல்வி வாழ்க்கையையும் அர்த்தமற்றதாக மாற்றியுள்ளதுடன், மாணவர்களை உச்சக்கட்ட மன அழுத்தத்துக்குள்ளும் தள்ளியுள்ளது.
