Thursday, October 8, 2026 8:52 pm
கிராமப்புற மக்களை நகரங்களை நோக்கி ஈர்ப்பதற்குப் பதிலாக, கிராமங்களிலேயே பொருளாதார வாய்ப்புகளையும் வசதிகளையும் உருவாக்குவதிலேயே அரசாங்கத்தின் பொருளாதார மற்றும் சமூக அபிவிருத்திப் பாதை கவனம் செலுத்துவதாக ஜனாதிபதி அனுர குமார திஸாநாயக்க தெரிவித்தார்.
கிராம உத்தியோகத்தர் சேவையின் மூன்றாம் தரத்திற்குத் தகுதி பெற்ற 1,540 அதிகாரிகளுக்கு நியமனக் கடிதங்களை வழங்கும் வைபவம் நடைபெற்றபோது உரையாற்றிய ஜனாதிபதி, கிராமங்களையும் நகரங்களையும் இணைக்கும் நன்கு அபிவிருத்தி செய்யப்பட்ட வீதி வலையமைப்பு, பயனுள்ள தகவல் தொடர்பு அமைப்பு மற்றும் திறமையான பொதுச் சேவை ஆகியவற்றை நிறுவுவதன் முக்கியத்துவத்தை வலியுறுத்தினார். டிஜிட்டல் பொருளாதார அமைச்சின் ஒருங்கிணைப்புடன் அடுத்த மூன்று ஆண்டுகளுக்குள் நாடு தழுவிய தகவல் தொடர்பு அமைப்பு உருவாக்கப்படும் என்றும், வரவிருக்கும் வரவு-செலவுத் திட்டத்தின் நிதியுதவியுடன் அடுத்த ஆண்டு இரண்டு மாவட்டங்களில் முன்னோடித் திட்டம் ஒன்று செயல்படுத்தப்படும் என்றும் அவர் குறிப்பிட்டார்.
