Wednesday, October 7, 2026 7:27 pm
இங்கிலாந்தின் ராயல் ஏர் ஃபோர்ஸ் (RAF) ஃபேர்ஃபோர்ஸ் தளத்தில் நிறுத்தப்பட்டிருந்த அனைத்து அமெரிக்க B-1 குண்டுவீச்சு விமானங்களும் அமெரிக்காவிற்குத் திரும்பப் பெறப்பட்டதாக பென்டகன் ஞாயிற்றுக்கிழமை தெரிவித்தது. விமானப்படை தளத்திற்கு அருகில் ஏற்பட்ட பாதுகாப்பு தொடர்பான ஒரு சம்பவத்தைத் தொடர்ந்து, அப்பகுதியிலிருந்த 85 வீடுகளில் வசிப்பவர்கள் வெளியேற்றப்பட்டனர்.
விமானங்கள் தங்கள் சொந்த தளங்களுக்குத் திரும்பியதை பென்டகன் அதிகாரி ஒருவர் உறுதிப்படுத்தினார்; ஆனால், செயல்பாட்டுப் பாதுகாப்பு காரணங்களால், அந்த விமானங்கள் நகர்த்தப்பட்டபோது அது குறித்த தகவல்களை அமெரிக்காவால் வெளியிட முடியவில்லை என்று அவர் கூறினார்.
தென்மேற்கு இங்கிலாந்தில் உள்ள அந்த விமானப்படை தளத்திற்கு கடந்த ஞாயிற்றுக்கிழமை பொலிஸ் வரவழைக்கப்பட்டது. சந்தேகத்திற்கிடமான நடவடிக்கையில் ஈடுபட்டதாகக் கருதப்படும் பல வான்களையும் ஒரு குழுவினரையும் பார்த்ததாக உள்ளூர் விவசாயி ஒருவர் தகவல் அளித்ததைத் தொடர்ந்து இந்த நடவடிக்கை எடுக்கப்பட்டது.
இந்தச் சம்பவத்தைத் தொடர்ந்து, தளத்திற்கு அருகிலுள்ள 85 வீடுகளில் வசிப்பவர்கள் வெளியேற்றப்பட்டனர். ஈரான் மீதான தாக்குதல்களை நடத்த அமெரிக்கா இந்தத் தளத்தைப் பயன்படுத்தி வருகிறது என்பது குறிப்பிடத்தக்கது.
இங்கிலாந்தில் இந்த வாரம் எரிசக்தி விலைகள் உச்சத்தில் உள்ள நிலையில், பாதுகாப்பு அச்சுறுத்தல் அல்லது எரிபொருள் திருட்டு போன்ற காரணங்களுக்காக இந்த நடவடிக்கை மேற்கொள்ளப்பட்டிருக்கலாம் என்று யூகங்கள் எழுந்தன.
வான்களில் வெடிபொருட்கள் எதுவும் கண்டறியப்படவில்லை என்றும், ஆனால் “குறிப்பிட்ட அளவு பெட்ரோல்” கைப்பற்றப்பட்டதாகவும் புலனாய்வாளர்கள் தெரிவித்தனர். இத்தகவலை இங்கிலாந்தின் தேசிய பயங்கரவாத எதிர்ப்பு காவல் பிரிவின் தலைவர் லாரன்ஸ் டெய்லர் தெரிவித்தார்.
இந்தச் சம்பவம் தொடர்பாக இலண்டனைச் சேர்ந்த 20-களின் மத்தியில் வயதுடைய ஐந்து பிரிட்டிஷ் ஆண்கள் கைது செய்யப்பட்டு, பின்னர் பிணையில் விடுவிக்கப்பட்டனர்.
வெளியுறவுத்துறை அமைச்சர் மார்கோ ரூபியோ, இச்சம்பவத்தில் ஒரு “வெளிநாட்டுத் தரப்பு” ஈடுபட்டிருந்ததாகக் கூறினார்; ஆனால் அந்தத் தரப்பு எது என்பதை அவர் பகிரங்கமாக அடையாளம் காட்டவில்லை.
இலண்டனில் உள்ள ஈரானின் தூதரகம், இதில் தெஹ்ரான் சம்பந்தப்பட்டிருப்பதாகக் கூறப்படும் யூகங்களை “முற்றிலும் நிராகரிப்பதாகவும், கடுமையாகக் கண்டிப்பதாகவும்” கூறி நிராகரித்தது.
மார்ச் மாதம், “ஈரானுக்குள் குறிப்பிட்ட தற்காப்பு நடவடிக்கைகளுக்காக” அந்தத் தளத்தைப் பயன்படுத்த பிரிட்டன் வாஷிங்டனுக்கு அனுமதி வழங்கியது. அதன் பிறகு, அமெரிக்க குண்டுவீச்சு விமானங்கள் மற்றும் பிற விமானங்கள் அந்தத் தளத்திலிருந்து புறப்படுவதும் தரையிறங்குவதும் காணப்பட்டன.
