Wednesday, November 26, 2025 3:59 pm
விடுதலைபுலிகளின் தலைவரின் ஆட்சியில் தமிழர் தாயகப்பரப்பில் கடற்றொழில், விவசாயம் என்பன தன்னிறைவு பெற்றிருந்ததாகவும், போதைப்பொருட்கள் அறவே அற்ற பாதுகாப்பான சூழல் இருந்ததாகவும் வன்னிமாவட்ட நாடாளுமன்ற உறுப்பினர் துரைராசா ரவிகரன் இன்று புதன்கிழமை நாடாளுமன்றத்தில் தெரிவித்துள்ளார்.
இதனால் தான் அவரை தமிழ் மக்கள் இறைவனாகப் போற்றுகின்றனர் எனவும் தமிழ் இனத்தின் இறைவனான வே.பிரபாகரனுக்கு தனது பிறந்தநாள் வாழ்த்துக்களையும் நாடாளுமன்றில் அவர் தெரிவித்தார்.
அவர் மேலும் தெரிவிக்கையில்,
மேதகுவின் ஆட்சியில் கடலிலே இந்திய இழுவைப்படகுகளின் அத்துமீறல்களும் அடாவடிகளும் இருக்கவில்லை. சட்டவிரோத கடற்றொழில் செயற்பாடுகள் இருக்கவில்லை. காணி அபகரிப்புக்களும் இல்லை. எனவே தமிழர் தாயகம் விவசாயத்திலும் செழித்திருந்ததது. போதைப் பொருட்கள் அறவே இல்லை. நள்ளிரவிலும் பெண்கள் சுதந்திரமாக உலவக்கூடிய நிலையிருந்தது. தாயகப்பரப்பில் மக்கள் தன்னிறைவு பெற்று பாதுகாப்பாக வாழ்ந்தனர். அவரது ஆட்சிக் காலத்தினைச் சங்ககாலமாகவும் மக்கள் போற்றுகின்றனர். அந்த தமிழ் இனத்தின் இறைவனுக்கு இன்று பிறந்தநாள். இந்த உயரிய சபையிலே மேதகு அவர்களுக்கு எனது பிறந்தநாள் வாழ்த்துக்களைத் தெரிவித்துக்கொள்கின்றேன் – என்றார்.
“ஆழக் கடல் எங்கும் சோழ மகராஜன் ஆட்சிபுரிந்தானே அன்று
தமிழீழக் கடலெங்கும் எங்கள் கரிகாலன் ஏறி நடக்கின்றான் இன்று
காலை விடிந்ததென்று பாடு சங்க காலம் திரும்பியது ஆடு” என்ற பாடலைப் பாடி, இவ்வாறாகவே தமிழ் இனத்தின் தேசியத் தலைவனது ஆட்சியை வடக்கு, கிழக்குத் தமிழர் தாயகப்பரப்பில் வாழ்ந்த தமிழ் மக்கள் கொண்டாடினார்கள் எனவும் நாடாளுமன்றத்தில் தெரிவித்தார்.
இன்று புதன்கிழமை இலங்கையின் வடக்கு, கிழக்கு உள்ளிட்ட தமிழர் தாயகப் பகுதிகளிலும் புலம்பெயர் தேசங்களிலும் விடுதலைபுலிகளின் தலைவர் வேலுப்பிள்ளை பிரபாகரனின் பிறந்தநாளும், கார்த்திகை 27 மாவீரர் நாள் நினைவேந்தல் அனைத்து தமிழ் மக்களாலும் நினைவுகூரப்படுகின்றமை குறிப்பிடத்தக்கது.
