Thursday, November 5, 2026 7:08 pm
இலஞ்சம் அல்லது ஊழல் குற்றச்சாட்டுகள் குறித்த புகார்களை விசாரிக்கும் ஆணைக்குழுவால் முடக்கப்பட்டிருந்த சட்டப்பணியாளர் ரகித ராஜபக்ஷவுக்குச் சொந்தமான வங்கிக் கணக்குகளையும் மூன்று வாகனங்களையும் மேலும் மூன்றாண்டு காலத்திற்கு இடைநீக்கம் செய்யுமாறு கொழும்பு உயர் நீதிமன்ற நீதிபதி ருவன் திசாநாயக்க இன்று வியாழகிழமை [5]உத்தரவிட்டார். இலஞ்ச ஆணைக்குழுவின் கோரிக்கையைப் பரிசீலித்த பின்னர், கொழும்பு உயர் நீதிமன்றம் இந்த உத்தரவைப் பிறப்பித்தது.
துபாயில், கைது செய்யப்பட்ட பாதாள உலக போதைப்பொருள் மன்னன் என சந்தேகிக்கப்படும் ஹரக் கட்டா, என்றழைக்கப்படும் நதுன் சிந்தக விக்ரமரத்னவின் மனைவியிடமிருந்து 12 கோடி ரூபாயி லஞ்சம் பெறப்பட்டதாகக் கூறப்படும் சம்பவம் குறித்து விசாரணை தொடங்கப்பட்டுள்ளதாக, இலஞ்ச ஆணைக்குழுவின் சார்பில் வாதங்களை முன்வைத்த ஆணைக்குழுவின் உதவித் தலைமை இயக்குநர் நீதிமன்றத்தில் தெரிவித்தார்.
அவரது பாதுகாப்பை உறுதி செய்வதற்கும், அவரை ஒரு பாதுகாப்பான சிறைக்கு மாற்றுவதற்கு வசதி செய்து கொடுப்பதற்கும் ஈடாக, கூறப்படும் அந்த இலஞ்சம் பெறப்பட்டதாகத் தெரிவிக்கப்படுகிறது.
ரகித ராஜபக்ஷவுக்குச் சொந்தமான வங்கிக் கணக்குகள் ,மூன்று வாகனங்கள் ஆகியவை பற்றியதகவல்கள் விசாரணையில் வெளிப்பட்டுள்ளதாகவும், இது தொடர்பாக மேலதிக விசாரணைகள் நடத்தப்பட்டு வருவதாகவும் அவர் மேலும் தெரிவித்தார்.
ஊழல் தடுப்புச் சட்டம் மற்றும் குற்றச்செயல் வருமானச் சட்டத்தின் விதிகளுக்கு இணங்க, சம்பந்தப்பட்ட வங்கிக் கணக்குகளையும் வாகனங்களையும் மூன்று மாத காலத்திற்கு முடக்கி உத்தரவு பிறப்பிக்குமாறு உதவி தலைமை இயக்குநர் நீதிமன்றத்தைக் கேட்டுக்கொண்டார்.
ரகிதா ராஜபக்ஷ சார்பில் ஆஜரான சட்டத்தரணி சமிந்த அதுகோரல, வங்கிக் கணக்குகளும் வாகனங்களும் குற்றச்செயல் மூலம் கிடைத்தவை என்பதை நிலைநாட்டும் சான்றுகள், அவற்றைத் தடுத்து வைப்பதற்கான உத்தரவு பிறப்பிக்கப்படுவதற்கு முன்பாக நீதிமன்றத்தில் சமர்ப்பிக்கப்பட வேண்டும் என்று வாதிட்டார்.
இருப்பினும், இந்தக் கட்டத்தில் அத்தகைய எந்த ஆதாரமும் நீதிமன்றத்தில் சமர்ப்பிக்கப்படவில்லை என்று அவர் வாதிட்டார். மேலும், குற்றம் நடந்ததாகக் கூறப்படுவதற்கு முன்பே சம்பந்தப்பட்ட வங்கிக் கணக்குகள் திறக்கப்பட்டிருந்தன என்றும் அவர் சுட்டிக்காட்டினார்.
இதற்குப் பதிலளிக்கும் விதமாக, இலஞ்ச ஆணையத்தின் உதவி தலைமை இயக்குநர், குற்றச்செயல் வருமானச் சட்டத்தின் 75-வது பிரிவின்படி, அத்தகைய சொத்துக்களை முடக்கி உத்தரவு பிறப்பிக்க நீதிமன்றத்திற்கு அதிகாரம் உள்ளது என்று நீதிமன்றத்திற்குத் தெரிவித்தார்.
இரு தரப்பினரும் அளித்த வாதங்களைப் பரிசீலித்த நீதிபதி, குற்றச்செயல் வருமானச் சட்டத்தின் விதிகளின் கீழ் அத்தகைய உத்தரவைப் பிறப்பிப்பதற்கு எந்தச் சட்டத் தடையும் இல்லை என்று குறிப்பிட்டார்.
அதன்படி, சம்பந்தப்பட்ட வங்கிக் கணக்குகளையும் வாகனங்களையும் மூன்று மாத காலத்திற்கு முடக்குமாறு நீதிபதி உத்தரவிட்டார்.
வாகனங்கள் மற்றும் அது தொடர்பான சொத்துக்கள் குறித்து, சம்பந்தப்பட்ட கணக்குகள் உள்ள வங்கிகளுக்கும், மோட்டார் போக்குவரத்து ஆணையர் நாயகத்திற்கும் பாதுகாப்பு உத்தரவுகளைத் தெரிவிக்க வேண்டும் என்றும் நீதிபதி மேலும் உத்தரவிட்டார்.
