Sunday, November 23, 2025 12:27 pm
இலங்கையில் தற்போது அதிகளவான சுற்றுலாப் பயணிகள் வருகை தந்தவண்ணம் உள்ளனர். உள்ளூர் மற்றும் வெளிநாட்டு சுற்றுலாப் பயணிகளை ஈர்க்கும் ஒரு முக்கிய இடமாக தெமோதரை ஒன்பது வளைவுப் பாலம் காணப்படுகின்றது.
இரவிலும் ஒன்பது வளைவுப் பாலத்தின் அழகை வெளிப்படுத்தும் விதத்தில் பாலத்தில் விளக்குகள் பொருத்தும் திட்டம் முன்வைக்கப்பட்டது.
இந்த நிலையில் விளக்குத் திட்டத்தைத் திறப்பது காலவரையின்றி ஒத்திவைக்கப்பட்டுள்ளதாக மத்திய கலாசார நிதியம் தெரிவித்துள்ளது.
தனியார் சொத்து மூலம் மின்சார இணைப்பைப் பெறுவதில் ஏற்பட்ட சர்ச்சையால் இந்த தாமதம் ஏற்பட்டுள்ளதாக மத்திய கலாசார நிலையத்தின் பணிப்பாளர் நிலன் கூரே கூறியுள்ளார்.
பாலம் மற்றும் அதனை சுற்றியுள்ள பகுதிக்கு விளக்குகளைப் பொருத்துவதற்காக நிறுவப்பட்ட மின்மாற்றிக்கு மின்சாரம் வழங்கத் தேவையான மின் கேபிள்களை அனுமதிப்பதற்கு நில உரிமையாளர்கள் சார்பில் எதிர்ப்பு தெரிவிக்கப்பட்டுள்ளது.
இதன் காரணமாக இந்த மாதம் நிறைவடையும் என எதிர்பார்க்கப்பட்ட இந்த திட்டம் புதிய திகதி இல்லாமல் தாமதமாகியுள்ளதாக மத்திய கலாசார நிலையத்தின் பணிப்பாளர் நிலன் கூரே கூறியுள்ளார்.
