Wednesday, November 18, 2026 12:12 pm
குவைத்தில் உள்ள அலி அல்-சலீம் விமானப்படைத் தளத்தில் இருந்த அமெரிக்க வான் பாதுகாப்பு அமைப்புகள், ட்ரோன், ஏவுகணை ஏவுதளங்களை, தங்களது போர் ட்ரோன்கள் மூலம் தாக்கியதாக ஈரான் ராணுவம் புதன்கிழமை தெரிவித்துள்ளது.
ஈரான் ராணுவத்தின் மக்கள் தொடர்பு அலுவலகம் வெளியிட்டுள்ள அறிக்கையில், புதன்கிழமை அதிகாலையில் நடத்தப்பட்ட இந்தத் தாக்குதலில், அமெரிக்க ராணுவத் தளத்திலிருந்த ‘பேட்ரியாட்’ (Patriot) வான் பாதுகாப்பு அமைப்புகளும், ட்ரோன்கள் மற்றும் ஏவுகணைகளை ஏவுவதற்குப் பயன்படுத்தப்படும் தளங்களும் குறிவைக்கப்பட்டதாகக் குறிப்பிடப்பட்டுள்ளது.
இந்த விமானப்படைத் தளம், இப்பகுதியில் உள்ள ஒரு முக்கியமான அமெரிக்க இராணுவத் தளம் என்றும், இது ஒரு வான்வழி போக்குவரத்து மையமாகவும், மேற்கு ஆசியாவிற்குள் அமெரிக்கப் படைகள் நுழைவதற்கான நுழைவாயிலாகவும் செயல்படுகிறது என்று அந்த அறிக்கையில் விவரிக்கப்பட்டுள்ளது. மேலும், அமெரிக்க ராணுவத்தின் பிராந்திய ராணுவ மற்றும் தளவாட உத்திகளில் இது முக்கிய பங்கு வகிக்கிறது என்றும் அதில் தெரிவிக்கப்பட்டுள்ளது.
“ஈரானைப் பாதுகாப்பதில் நாங்கள் எந்தச் சக்திக்கும் தலைவணங்க மாட்டோம்” என்று அந்த அறிக்கையில் கூறப்பட்டுள்ளது. மேலும், ஈரானுக்கு எதிராக விடுக்கப்படும் எந்தவொரு அச்சுறுத்தலோ அல்லது ஆக்கிரமிப்போ, புவியியல் எல்லைகளுக்கு அப்பாற்பட்ட, “தீர்க்கமான மற்றும் கடுமையான” பதிலடியைச் சந்திக்கும் என்றும் எச்சரிக்கப்பட்டுள்ளது.
இந்தத் தாக்குதலால் ஏற்பட்ட சேதங்கள் அல்லது உயிரிழப்புகள் குறித்த கூடுதல் விவரங்கள் எதையும் அந்த அறிக்கை வெளியிடவில்லை.

