Monday, October 5, 2026 8:57 am
ஏமனில் மோதல்கள் தீவிரமடைந்து வரும் நிலையில், ஹூதி அமைப்பின் கட்டுப்பாட்டில் உள்ள பகுதிகளை மீண்டும் கைப்பற்ற சர்வதேச அளவில் அங்கீகரிக்கப்பட்ட அரசு புதிய இராணுவ நடவடிக்கையை அறிவித்துள்ளது. இதற்கிடையில், கடந்த 24 மணி நேரத்தில் ஹூதி கட்டுப்பாட்டுப் பகுதிகளில் சவூதி அரேபியா 106 வான்வழி ,ஏவுகணைத் தாக்குதல்களை நடத்தியதாக ஹூதி அமைப்பு ஞாயிற்றுக்கிழமை தெரிவித்தது.
சவூதியின் தாக்குதல்கள் தலைநகர் சனா , அல்-ஜவ்ஃப் , தைஸ் உள்ளிட்ட மாகாணங்களைத் தாக்கியதாக ஹூதி இராணுவ செய்தித் தொடர்பாளர் யஹ்யா சரேயா சமூக ஊடகத் தளமான ‘எக்ஸ்’ (X)-இல் தெரிவித்தார்.
தற்போதைய மோதல் தீவிரமடைந்ததிலிருந்து சவூதி நடத்திய வான்வழி மற்றும் ஏவுகணைத் தாக்குதல்களின் மொத்த எண்ணிக்கை இந்தத் தாக்குதல்களுடன் சேர்த்து 1,516-ஐ எட்டியுள்ளதாக சரேயா கூறினார்.
இந்த எண்ணிக்கையைச் சுதந்திரமாக உறுதிப்படுத்த முடியவில்லை; மேலும், ஹூதிகள் தெரிவித்த தாக்குதல்களை நடத்தியதை சவுதி அரேபியா உறுதிப்படுத்தவில்லை.
ஹூதி அமைப்பின் கட்டுப்பாட்டில் உள்ள பகுதிகளை மீண்டும் கைப்பற்றுவதற்கான நடவடிக்கையில் ஒரு புதிய கட்டமாக, “விடுதலைப் போர்” (battle of liberation) தொடங்கியுள்ளதாக ஏமன் அரசு அறிவித்த சில மணிநேரங்களிலேயே ஹூதிகளின் இந்த அறிக்கை வெளியானது.
ஏமனின் தென்மேற்குப் பகுதிகளில் கடுமையான சண்டைகள் பரவி வருவதாலும், ஏவுகணை, ட்ரோன் , வான்வழித் தாக்குதல்கள் மீண்டும் தொடங்கியதன் மூலம் ஹூதிகளுக்கும் சவுதி அரேபியாவிற்கும் இடையே நேரடி மோதல்கள் புதுப்பிக்கப்பட்டதாலும், ஏமன் மோதல் பல ஆண்டுகளில் இல்லாத அளவுக்குத் தீவிரமடைந்துள்ள சூழலில் இந்த நிகழ்வுகள் நடந்துள்ளன. ஏமனில் மோதல் 2014-ஆம் ஆண்டின் பிற்பகுதியில் தொடங்கியது; அப்போது ஹூதி கிளர்ச்சியாளர்கள் தலைநகர் சனா மற்றும் வடக்கு ஏமனின் பெரும்பகுதியைக் கைப்பற்றினர். இதனைத் தொடர்ந்து, சர்வதேச அளவில் அங்கீகரிக்கப்பட்ட ஏமன் அரசாங்கத்திற்கு ஆதரவாக, சவூதி அரேபியா தலைமையிலான கூட்டணிப் படைகள் மார்ச் 2015-இல் இதில் தலையிட்டன.
