Sunday, November 30, 2025 11:28 pm
இலங்கைத்தீவில் ஏற்பட்ட புயல் பல அழிவுகளை உருவாக்கியுள்ளது. ஆனாலும் மீள் புனரமைப்புக்கு தேவையான வளங்களை சேகரிப்பதற்காக நிதியம் ஒன்றை அமைக்க அரசாங்கம் நடவடிக்கை எடுத்து வருவதாக ஜனாதிபதி அனுரகுமார திஸாநாயக்க இன்று ஞாயிற்றுக்கிழமை இரவு 8.30 இற்கு மக்களுக்கு நிகழ்த்திய உரையில் தெரிவித்தார்.
உயிாிழந்த காயமடைந்த மற்றும் காணாமல் போன இலங்கை மக்களை நினைத்துக் கவலை வெளியிட்ட ஜனாதிபதி அநுர, உறவினர்களுக்கு தனது ஆழ்ந்த அனுதாபத்தையும் தெரிவித்தார்.
மக்களுக்கு உரையாற்றிய அநுர, நிதியை மேற்பார்வை செய்வதற்காக அரசாங்கம் தனியார் துறை, வெளிவிவகார அமைச்சு, நிதி அமைச்சு மற்றும் ஜனாதிபதி செயலகம் ஆகியவற்றின் உறுப்பினர்களை உள்ளடக்கிய கூட்டு முகாமைத்துவக் குழுவொன்றை உருவாக்கியுள்ளதாக குறிப்பிட்டார்.
அத்துடன் அவர்களுக்கு குறிப்பிடத்தக்க பொறுப்பு வழங்கப்பட்டுள்ளது. இலங்கைத்தீவை மீளக் கட்டியெழுப்புவதற்கு கணிசமான அளவு நிதியை திரட்ட முடியும். நட்பு நாடுகளுடன் இணைந்து அவர்களின் உதவிகளை பெற்றுக் கொள்ள அரசாங்கம் பல்வேறு சர்வதேச அமைப்புகளுடன் இணைந்து செயற்பட ஆரம்பித்துள்ளது என்றும் ஜனாதிபதி அநுர சுட்டிக்காட்டினார்.
இப் பேரழிவில் இருந்து இலங்கை மக்களை மீட்டெடுக்க அரசாங்கம், ஒரு வலுவான நிதியை நிறுவ வேண்டும் என்பதில் கட்சி வேறுபாடுகளுக்கு அப்பால் சிந்திக்க வேண்டும் எனவும் விளக்கினார்.
புயிலின் பின்னரான சூழலில், பெரும் பொருளாதார நெருக்கடியை ஒன்றை இலங்கை மக்கள் சந்திக்கவுள்ளனர் என்று சிலரால் முன்வைக்கப்படுகின்ற எச்சரிக்கையான கருத்தியல் பற்றி அலட்டிக் கொள்ளாத ஜனாதிபதி அநுர, மீள் நிர்மாணங்களை துரித கதியில் செய்து முடிப்போம் என்ற துணிச்சலான சிந்தனையை தனது உரையில் வெளிப்படுத்தினார்.
ஜனாதிபதி தனது உரையில் மேலும் தெரிவிக்கையில்,
முன்னை வரவுசெலவுத் திட்ட ஒதுக்கீடுகளில் இருந்து, தோராயமாக ரூ. 30 பில்லியன் நாடாளுமன்ற அனுமதியின்றி உடனடிச் செலவுக்குக் கிடைக்கிறது. இந்த நிதிகள் இந்த நோக்கத்திற்காக குறிப்பாக நியமிக்கப்பட்டுள்ளன.
தேவையான நிதி மற்றும் பணிகள் குறித்து விரிவான மதிப்பீடுகளை வழங்க மாவட்ட செயலாளர்களுக்கு உத்தரவிடப்பட்டுள்ளது, இதனால் வளங்களை திறம்பட ஒதுக்க முடியும்.
2025 ஆம் ஆண்டு வரவு செலவுத் திட்டத்தில் ஒதுக்கப்பட்டுள்ள ஒதுக்கீடுகள் போதுமானதாக இல்லாவிட்டால், கூடுதல் ஒதுக்கீடுகளைப் பெறுவதற்கு துணை மதிப்பீடுகள் மற்றும் நாடாளுமன்றத்தின் மூலம் நடவடிக்கை எடுக்கப்படும்.
இடம்பெயர்ந்த மக்களின் உணவு, சுகாதாரம் மற்றும் சுகாதாரத் தேவைகளைப் பூர்த்தி செய்ய நடவடிககை எடுக்கப்படும். மேலும், இந்த அனர்த்தம் அத்தியாவசிய சேவைகள் மற்றும் உட் கட்டமைப்புகளுக்கு பாரிய சேதத்தை ஏற்படுத்தியுள்ளது.
பல பகுதிகளில் மின்சாரம் துண்டிக்கப்பட்டுள்ளது. தண்ணீர் மற்றும் தகவல் தொடர்பு அமைப்புகளும் சேதமடைந்துள்ளதுடன், நெடுஞ்சாலைகள், வீதிகள் சேதமடைந்துள்ளன. இத்தகைய உட்கட்டமைப்பு மற்றும் சேவைகளில் பெரும் பகுதி புயலினால் அழிவடைந்துள்ளது.
ஆகவே, அத்தியாவசிய சேவைகள் மற்றும் உட்கட்டமைப்பை திறம்பட விரைவாக மீட்டெடுக்க ஒவ்வொரு துறையிலும் செயற்பாட்டு பணிகளை அரசாங்கம் தீவிரமாகவும் உடனடியாகவும் முன்னெடுத்துள்ளது என்று விளக்கிக் கூறினார்.
