Saturday, November 22, 2025 5:12 pm
கொழும்பு பாதுகாப்பு பற்றிய மாநாடு முடிவடைந்த பின்னர், இந்திய – இலங்கை இராணுவ ஒத்துழைப்பு மாநாடு இந்தியாவின் பீகார் போத்கயாவில் நடைபெற்றுள்ளதாக டிப்ளோமேசி பையோன்ட் (diplomacybeyond) என்ற ஆங்கில செய்தித் தளம் செய்தி வெளியிட்டுள்ளது.
பிராந்திய பாதுகாப்பை மேற்படுத்தும் நோக்கில் இராணுவ பணியாளர் மட்டத்தில் இடம்பெற்ற மாநாட்டில், இரு நாடுகளினதும் இராணுவ செயற்பாடுகள் பற்றி விரிவாக ஆராயப்பட்டுள்ளதாக அந்த செய்தித் தளம் கூறியுள்ளது.
சென்ற 18 ஆம் திகதி முதல் 20 வரை இடம்பெற்ற இந்த மாநாட்டில் இந்திய – இலங்கை பாதுகாப்பு உயர்மட்ட அதிகாரிகளும் பங்குபற்றியிருந்தனர்.
இந்திய – இலங்கை இராணுவச் செற்பாட்டுத் திறனைகளை அதிகரிப்பதும், தொழில்நுட்ப பரிமாற்றங்கள் இருதரப்பு இராணுவ உறவு போன்ற பல விடயங்கள் பற்றி பாதுகாப்பு அதிகாரிகள் கவனம் கூடுதல் கவனம் செலுத்தினர்.
இதேவேளை, இந்தோ – பசுபிக் பிராந்திய கூட்டு இராணுவ பயிற்சி ஒன்று தற்போது நடைபெறுகின்றது. அதாவது, இந்திய – இலங்கை இராணுவம் இணைந்து பங்குபற்றும் 11வது ‘மித்ர சக்தி’ கூட்டுப் பயிற்சி இந்தியாவின் கர்நாடகா மாநிலம் பெலகாவியில் தற்போது நடைபெற்று வருகிறது. இரண்டு நாடுகளினதும் விமானப் படையினரும் இணைந்து இப் பயிற்சியில் ஈடுபடுகின்றனர்.
ட்ரோன்கள் – ஆளில்லா வான்வழி அமைப்புகளை பயன்படுத்தி, தாக்குதல், தேடுதல் போன்ற தந்திரோபாய செயல்பாடுகளை இரு தரப்பு இராணுவத்தினரும் பயிற்சி செய்கின்றனர். மேலும் முப்படை மூலோபாய முறைகள் பற்றியும் இரண்டு தரப்பு இரணுவத்தினரும் ஆராய்ந்து வருகின்றனர்.
ஐக்கிய நாடுகள் சபையின் பயங்கரவாத எதிர்ப்பு நடவடிக்கைகள் தொடர்பான கூட்டு ஒத்திகை என்று இந்திய பாதுகாப்பு துறை அதிகாரிகள் கூறுகின்றனர்.
அதேவேளை, இந்தியத் தலைநகர் புதுடில்லியில், சென்ற வாரம், இரண்டு நாட்கள் நடைபெற்ற கொழும்பு பாதுகாப்பு (Colombo Security Conclave – CSC) மாநாடு முடிவடைந்த பின்னர், இரு நாட்டு இராணுவத்தின் ஒத்துழைப்பு மாநாடு நடைபெற்றமை முக்கியமானது என இந்திய ஊடகங்கள் தெரிவித்துள்ளன.
