இஸ்ரேலின் தாக்குதலால் நிலவும் பாதுகாப்பு சூழ்நிலை காரணமாக ஈரானில் உள்ள இலங்கைத் தூதரகம் தற்காலிகமாக தெஹ்ரானில் இருந்து இடமாற்றம் செய்யப்பட்டுள்ளதாக வெளியுறவு அமைச்சர் விஜித ஹேரத் பாராளுமன்றத்தில் தெரிவித்தார். இருப்பினும் அனைத்து தொடர்பு எண்களும் செயல்பாட்டில் உள்ளன எனவும் அவர் தெரிவித்தார்.
தூதரக ஊழியர்களைத் தவிர, தெஹ்ரானில் உள்ள தூதரகத்தில் பணியாற்றிய எட்டு இலங்கை மாணவர்களும் பாதுகாப்பு காரணங்களுக்காக ஈரானின் வடக்குப் பகுதிக்கு மாற்றப்பட்டுள்ளனர். தூதரக வளாகத்திற்கு அருகாமையில் தாக்குதல்கள் நடந்ததால், முன்னெச்சரிக்கை நடவடிக்கை எடுக்கப்பட்டது என்று அமைச்சர் ஹேரத் குறிப்பிட்டார்.
ஈரானில் சுமார் 35 இலங்கையர்கள் தங்கியிருப்பதாகவும், தெஹ்ரானில் வசிப்பவர்கள் தற்போது அதிக ஆபத்தை எதிர்கொள்வதாகவும் ,இதற்கு நேர்மாறாக, கிட்டத்தட்ட 20,000 இலங்கையர்கள் தற்போது இஸ்ரேலில் இருப்பதாகவும் அவர் கூறினார்.
