Thursday, November 19, 2026 2:52 pm
சீனாவின் பிரம்மாண்டமான ஓய்வு விடுதி ஒன்றில் வியாழக்கிழமை நடைபெறவுள்ள ஷி ஜின்பிங், டொனால்ட் ட்ரம்ப் , விளாடிமிர் புட்டின் ஆகியோருக்கு இடையிலான பேச்சுவார்த்தைகள், மிகவும் திட்டமிடப்பட்ட நிகழ்வாக அமையவுள்ளன. இதில் ஆக்கபூர்வமான முடிவுகளை விட, காட்சிகளுக்கே (பிம்பங்களுக்கே) அதிக முக்கியத்துவம் இருக்கும் என்று நிபுணர்கள் கருதுகின்றனர்.
இந்த வரலாற்றுச் சிறப்புமிக்க மூன்று தலைவர்களின் உச்சிமாநாடு, ஷென்சென் நகரின் பரபரப்பான மையப்பகுதிக்கு வெளியே அமைந்துள்ள ‘கைலின் வில்லா’ (Kylin Villa) எனும் இடத்தில் நடைபெறுகிறது. இந்த இடம் ஏற்கனவே வட கொரியத் தலைவர்கள் உட்பட பல வெளிநாட்டு முக்கிய பிரமுகர்களை வரவேற்ற வரலாற்றைக் கொண்டுள்ளது.
இருப்பினும், மலைகளால் சூழப்பட்ட ஏரிக்கரையோரத்தில் அமைந்துள்ள இந்த வளாகத்தில், மூடிய கதவுகளுக்குப் பின்னால் என்ன நடக்கிறது என்பதை அறிய, இந்தச் சந்திப்பின் ஒவ்வொரு சிறு விவரமும் உன்னிப்பாகக் கவனிக்கப்படும்.
புரூக்கிங்ஸ் இன்ஸ்டிடியூஷனைச் சேர்ந்த ரையன் ஹாஸ், ஏஎஃப்பி (AFP) செய்தி நிறுவனத்திடம் கூறுகையில், “பொதுவாக, சீனத் தலைவர்கள் ஒரு கூட்டத்தை நடத்தும்போது, ஒவ்வொரு விவரமும் மிகத் துல்லியமாகத் திட்டமிடப்படும். சீனத் தலைவர் அமைதியான அதிகாரத்துடனும், முழுமையான கட்டுப்பாட்டுடனும் காட்சியளிக்கும் வகையில் ஏற்பாடுகள் செய்யப்படும்” என்று தெரிவித்தார்.
மேலும் அவர் கூறுகையில், “இந்த முத்தரப்புச் சந்திப்பில் எதிர்பாராத நிகழ்வுகள் ஏதும் நடக்காமல் இருக்க, சீன ஜனாதிபதி ஷி ஜின்பிங்கின் குழுவினர் முழு முயற்சி எடுப்பார்கள். ஆனால், ட்ரம்ப் , புட்டின் போன்ற தலைவர்கள் இதில் பங்கேற்பதால், அனைத்தையும் முன்கூட்டியே திட்டமிட்டு, எதிர்பாராத தருணங்களை முழுமையாகத் தவிர்ப்பது கடினம்” என்று குறிப்பிட்டார்.
இந்த மூன்று சக்திவாய்ந்த தலைவர்களுக்கு இடையே நடைபெறும் முதல் சந்திப்பான இது, ஆசிய-பசிபிக் பொருளாதார ஒத்துழைப்பு (APEC) அமைப்பின் வருடாந்திர மாநாட்டின் ஒரு பகுதியாக நடைபெறுகிறது.1997-ல் திறக்கப்பட்ட ‘கைலின் வில்லா’, சீனத் தலைவர்கள் மற்றும் வெளிநாட்டு முக்கிய பிரமுகர்களை வரவேற்பதற்கான அதிகாரப்பூர்வ இடமாகும்.
அமைதியான சூழலில் அமைந்துள்ள இந்த வளாகத்தில், 1,600 பேர் அமரக்கூடிய 20-க்கும் மேற்பட்ட கூட்ட அறைகள், சுமார் 20 உணவகங்கள் , 480 விருந்தினர்களை உள்ளடக்கும் பிரம்மாண்டமான மண்டபம் ஆகியவை உள்ளன.
தென் கொரிய ஊடகச் செய்திகளின்படி, தற்போதைய வட கொரியத் தலைவரின் தந்தையான கிம் ஜாங் இல், 2006-ல் மேற்கொண்ட பயணத்தின்போது இந்த ‘கைலின் வில்லா’வில்தான் தங்கியிருந்தார் என்று கூறப்படுகிறது.

