Monday, October 19, 2026 8:22 am
இஸ்ரேலின் பராளுமன்றத் தேர்தலுக்கு ஒன்பது நாட்களுக்கு முன்பு, அமெரிக்க ஜனாதிபதி டொனால்ட் ட்ரம்ப் ஞாயிற்றுக்கிழமை இஸ்ரேலியப் பிரதமர் பெஞ்சமின் நெதன்யாகு மீண்டும் தேர்ந்தெடுக்கப்படுவதற்கு ஆதரவு தெரிவித்தார்.
தனது ‘ட்ரூத் சோஷியல்’ தளத்தில் பதிவிட்ட ஒரு பதிவில், வரவிருக்கும் தேர்தலில் நெதன்யாகுவுக்கு தனது “முழுமையான மற்றும் மொத்த ஆதரவை” வழங்குவதாக ட்ரம்ப் கூறினார்.
நெதன்யாகுவை ஒரு “மாபெரும் போர்வீரர் பிரதமர்” என்றும், ஈரானை எதிர்கொள்வதில் ஒரு முக்கிய அமெரிக்கக் கூட்டாளி என்றும் ட்ரம்ப் வர்ணித்தார். மேலும், நெதன்யாகு மீண்டும் தேர்ந்தெடுக்கப்படாவிட்டால், இந்தப் பணியை அமெரிக்காவே கையாள வேண்டியிருக்கும் என்றும் அவர் கூறினார்.
“இஸ்ரேலுக்குத் தவறான தலைவர் கிடைத்தால், அதாவது பிபியைத் தவிர வேறு யாராக இருந்தாலும், அமெரிக்கா இந்தப் பணியை நாமே செய்ய வேண்டியிருக்கும், ஆனால் நான் அவ்வாறு செய்ய விரும்பவில்லை,” என்று ட்ரம்ப் எழுதினார். X தளத்தில் ஒரு பதிவில் ட்ரம்பின் ஆதரவுக்கு நெதன்யாகு நன்றி தெரிவித்தார்.
மற்றொரு இஸ்ரேலியத் தலைவருடன் இணைந்து பணியாற்ற முடியுமா என்று கேட்டதற்கு, “ஒருவேளை செய்வேன், ஒருவேளை செய்யமாட்டேன். யார் அந்த வாய்ப்பை எடுக்க விரும்புகிறார்கள்?” என்று ட்ரம்ப் பதிலளித்தார்.
2023 ஒக்டோபர் 7 அன்று ஹமாஸ் தலைமையிலான தாக்குதலுக்குப் பிறகு இஸ்ரேலில் நடைபெறும் முதல் தேசியத் தேர்தலாக, ஒக்டோபர் 27 ஆஅம் திகதி பாராளுமன்றத் தேர்தல் நடைபெற உள்ளது.
நெதன்யாகு கடும் போட்டி நிறைந்த தேர்தலை எதிர்கொண்டுள்ள நிலையில், ட்ரம்ப் தனது ஆதரவைத் தெரிவித்துள்ளார். அரசாங்கத்தை அமைக்கத் தேவையான 61 இடங்களைப் பெறுவதில் அவரது கூட்டணி பின்தங்கியிருப்பதாக பெரும்பாலான கருத்துக் கணிப்புகள் காட்டுவதாக ஆக்சியோஸ் தெரிவித்துள்ளது.
