Thursday, October 29, 2026 8:04 pm
பாராளுமன்ற உறுப்பினர் நாமல் ராஜபக்ஷ ,மேலும் மூவர் மீது, 15 மில்லியன் ரூபா பணமோசடி செய்ததாகக் கூறப்படும் குற்றச்சாட்டின் பேரில் தாக்கல் செய்யப்பட்டுள்ள வழக்கு, 2027 பெப்ரவரி 11 ஆம் திகதி மீண்டும் விசாரணைக்கு எடுத்துக்கொள்ளப்படும் என கொழும்பு பிரதம நீதவான் நீதிமன்றம் இன்று வியாழக்கிழமை (29) உத்தரவிட்டது.
குற்றப் புலனாய்வுத் திணைக்களத்தின் நிதிக்குற்றப் புலனாய்வுப் பிரிவு, இந்த வழக்கின் விசாரணை தொடர்பான ஆவணங்கள் சட்ட ஆலோசனைக்காக சட்டமா அதிபருக்கு அனுப்பி வைக்கப்பட்டுள்ளதாக நீதிமன்றத்திற்குத் தெரிவித்ததைத் தொடர்ந்து, கொழும்பு பிரதம நீதவான் அசங்க எஸ். போதாரகம இந்த உத்தரவைப் பிறப்பித்தார்.
சட்டமா அதிபரிடமிருந்து மேலதிக அறிவுறுத்தல்களைப் பெறுவதற்கு கால அவகாசம் தேவைப்படுவதாக குற்றப் புலனாய்வுத் திணைக்களம் நீதிமன்றத்திடம் கோரியிருந்தது.
சமர்ப்பிக்கப்பட்ட கருத்துகளைக் கவனத்தில் கொண்ட நீதவான், வழக்கினை பெப்ரவரி 11 ஆம் திகதி மீண்டும் விசாரணைக்கு எடுத்துக்கொள்ள உத்தரவிட்டதுடன், அன்றைய தினம் விசாரணையின் முன்னேற்றம் குறித்து நீதிமன்றத்திற்கு அறிக்கை சமர்ப்பிக்குமாறும் புலனாய்வாளர்களுக்குப் பணித்தார்.
இந்த வழக்கு நாமல் ராஜபக்ஷ, நித்யா சேனாநி சமரநாயக்க, சுஜானி போகொல்லாகம மற்றும் சுதர்ஷன பண்டார கணேகோட ஆகியோருக்கு எதிராகத் தாக்கல் செய்யப்பட்டுள்ளது. இன்றைய தினம் நாமல் ராஜபக்ஷ நீதிமன்றத்தில் முன்னிலையாக வேண்டிய அவசியம் இருக்கவில்லை; அதேவேளை, மற்ற சந்தேக நபர்கள் நீதவான் முன்னிலையில் ஆஜராகினர்.
