Monday, September 28, 2026 4:01 pm
கதிர்காமம்–புட்டல வீதியில் உணவளிக்கும் வாகன ஓட்டிகள் மீது சட்ட நடவடிக்கை எடுக்க வனவிலங்கு பாதுகாப்புத் திணைக்களம் தீர்மானித்துள்ளது. இச்செயல் யானைகளை பரபரப்பான சாலைக்கு அருகிலேயே தங்கியிருக்கச் செய்வதாகவும், இதனால் வாகனங்கள் மீதான தாக்குதல் அபாயம் அதிகரிப்பதாகவும் கவலைகள் எழுந்துள்ள நிலையில் இந்த முடிவு எடுக்கப்பட்டுள்ளது.
உணவு தேடி சாலையில் வரும் வாகனங்களை வழிமறித்து நிற்கும் பழக்கத்திற்கு சுமார் எட்டு காட்டு யானைகள் பழகிவிட்டதாக வனவிலங்கு அதிகாரிகள் தெரிவிக்கின்றனர்.
கதிர்காமம் செல்லும் யாத்ரீகர்கள், மொனராகலை, வெல்லவாய, பண்டாரவளை ஆகிய இடங்களுக்குச் செல்லும் மக்கள் என தினமும் 2,000-க்கும் மேற்பட்ட வாகனங்கள் கதிர்காமம்–புட்டல வீதியைப் பயன்படுத்துகின்றன.
உணவு வழங்கப்படாதபோது சில யானைகள் வாகனங்களைத் தாக்கியதாகவோ அல்லது கவிழ்க்க முயன்றதாகவோ தகவல்கள் கிடைத்துள்ளதாக அதிகாரிகள் எச்சரித்துள்ளனர். சமீபத்திய சம்பவம் ஒன்றில், யானை பஸ் ஒன்றைத் ஒன்றைத் தாக்கியதில் அது கவிழ்ந்ததாகவும், இதனால் சுமார் 40 பேர் காயமடைந்ததாகவும் கூறப்படுகிறது.
வனவிலங்கு அதிகாரிகளின் தகவலின்படி, கடந்த ஆறு ஆண்டுகளிலிந்த வீதியில் நடந்த யானைத் தாக்குதல்களில் மூன்று பெண்களும் இரண்டு ஆண்களும் உயிரிழந்துள்ளனர்; மேலும் ஆண்டுதோறும் 100-க்கும் மேற்பட்ட வாகனங்கள் இத்தகைய சம்பவங்களால் சேதமடைகின்றன.
இச்சாலை யால தேசிய பூங்காவின் மண்டலம் 2-ன் ஊடாகச் செல்கிறது மற்றும் பொதுமக்களின் பயணத்திற்குத் திறக்கப்பட்டுள்ளது. இருப்பினும், வாகனங்களில் இருந்துகூட காட்டு விலங்குகளுக்கு உணவளிப்பது சட்டவிரோதமானது என்று வனவிலங்கு அதிகாரிகள் வலியுறுத்தியுள்ளனர்.
கோவிட்-19 பெருந்தொற்றுக் காலத்தில் வாகனப் போக்குவரத்து மட்டுப்படுத்தப்பட்டிருந்தபோது யானைகள் சாலை ஓரங்களில் நடமாடாமல், காட்டிற்குள் உள்ள இயற்கையான உணவு மூலங்களையே நம்பியிருந்ததாக அதிகாரிகள் தெரிவித்தனர்.
பஸ், சஃபாரி ஜீப் ஓட்டுநர்கள் யானைகளுக்குத் தொடர்ந்து உணவளித்து வருவதே இந்த நடத்தை மாற்றத்திற்குக் ஒரு முக்கிய காரணம் என்று வனவிலங்குத் துறை கூறியுள்ளது.
யானைகளுக்கு உணவளிக்கும் வாகனங்களை அதிகாரிகள் காணொளிப் பதிவு செய்வார்கள் என்றும், அச்செயலில் ஈடுபடுபவர்கள் மீது வனவிலங்குச் சட்டங்களின் கீழ் நீதிமன்ற நடவடிக்கை எடுக்கப்படும் என்றும் ஊவா மாகாண வனவிலங்குத் துறை உதவி இயக்குநர் டபிள்யூ. ஏ. இந்திரஜித் கூறியதாகத் தகவல்கள் தெரிவிக்கின்றன.
