Monday, December 1, 2025 4:07 pm
நடிகை சமந்தா மற்றும் பிரபல இயக்குநர் ராஜ் கோயம்புத்தூரில் திருமணம் செய்துகொண்டுள்ள விடயம் பேசுபொருளாகியுள்ளது.
நடிகை சமந்தா பிரபல தெலுங்கு நடிகர் நாக சைதன்யாவை கடந்த 2017 ஆம் ஆண்டு திருமணம் செய்துகொண்டார். இருவருக்கும் கடந்த 2021 ஆம் ஆண்டு விவாகரத்து கிடைத்தது. நாக சைதன்யா பிரபல நடிகை ஷோபிதாவை கடந்த ஆண்டு திருமணம் செய்துகொண்ட நிலையில் சமந்தா திருமணம் செய்யாது வாழ்ந்து வந்தார்.
இந்த நிலையில் பிரபல இயக்குநர் ராஜ் நிடிமொரு மற்றும் சமந்தா காதலித்து வருவதாக பல்வேறு தகவல்கள் வெளியாகின. ஆனால் இருவரும் தங்கள் காதலை வெளிப்படையாக அறிவிக்கவில்லை.
இன்று சமந்தா மற்றும் ராஜ் நிடிமொரு கோயம்புத்தூர் ஈஷா யோகா மையத்தில் உள்ள லிங்க பைரவி கோவிலில் திருமணம் செய்துகொண்டுள்ளார்கள். இருவருக்கும் நெருங்கிய வட்டத்தினர் மத்தியில் திருமணம் நடைபெற்றது.
பாலிவுட் சினிமாவில் பிரபல இயக்குநராக திகழ்ந்து வருபவர் ராஜ் நிடிமொரு. இவர் ஃபேமிலி மேன், கோ கோவா கோன், கன்ஸ் ரூ குலாப்ஸ், சிட்டெடல் ஆகிய பிரபல இணையத் தொடர்கள் மற்றும் படங்களை இயக்கியுள்ளார்.
இவர் இயக்கிய ஃபேமிலி மேன், சிட்டெடல் ஆகிய தொடர்களில் சமந்தா முக்கிய கதாபாத்திரங்களில் நடித்தார். இந்த காலத்தில் தான் இருவருக்கும் இடையில் நல்ல நட்பு ஏற்பட்டதாகவும் அந்த நட்பு தற்போது திருமணம் வரை சென்றுள்ளதாகவும் கூறப்படுகிறது.
சமந்தாவின் இரண்டாவது திருமணம் ரசிகர்களை வியப்பிலும், அதிர்ச்சியிலும் ஆழ்த்தியுள்ளது.
