Sunday, November 30, 2025 5:18 pm
டித்வா புயல் அழிவுகளுக்கு மத்தியில் யாழ்ப்பாணம் திருநெல்வேலிச் சந்தியில் வைத்து இளைஞர் ஒருவர் மிக கொடூரமாக வெட்டி படுகொலை செய்யப்பட்டுள்ளார். இச் சம்பவம் இன்று ஞாயிற்றுக்கிழமை பகல் இடம்பெற்றுள்ளது.
கொலை செய்யப்பட்ட இந்த இளைஞன் வன்முறை சம்பவங்களில் ஈடுபட்ட குற்றச்சாட்டில், பொலிஸாரினால் கைது செய்யப்பட்டு நீதிமன்றில் முன்னிலைப்படுத்தப்பட்டு கோப்பாய் பொலிஸ் நிலையத்தில் ஞாயிற்றுக்கிழமைகளில் கையெழுத்து இட வேண்டும் என்ற நிபந்தனையில் பிணையில் விடுதலை செய்யப்பட்டிருந்தார்.
இன்று ஞாயிற்றுக்கிழமை பொலிஸ் நிலையத்தில் கையெழுத்திட்ட பின்னர், நண்பனுடன் மோட்டார் சைக்கிளில் சென்று கொண்டிருந்தபோதே, நான்கு பேர் கொண்ட இளைஞர் குழு ஒன்றினால் வழிமறிக்கப்பட்டு கொலை செய்யப்பட்டுள்ளார்.
பொலிஸ் நிலையத்தில் இருந்து சுமார் ஒரு கிலோ மீற்றர் தூரத்தில் இக் கொலைச் சம்பவம் இடம்பெற்றிருக்கிறது. இரண்டு மோட்டார் சைக்கிளில் வந்த நான்கு பேர் கொண்ட இளைஞர் குழு இந்த இளைஞனை வழிமறித்துக் கொலை செய்ததாக பொலிஸார் தெரிவித்துள்ளனர்.
இளைஞன் மீது சரமாரியாக வாள் வெட்டு தாக்குதல் நடத்தப்பட்டிருக்கிறது. கால் ஒன்று துண்டிக்கப்பட்ட நிலையில் யாழ் போதனா வைத்தியசாலையில் அனுமதிக்கப்பட்ட போதும், இளைஞன் உயிாிழந்துள்ளதாக அங்கு மருத்துவர்கள் தெரிவித்துள்ளனர்.
இச் சம்பவம் குறித்து கோப்பாய் பொலிஸார் விசாரணைகளை ஆரம்பித்துள்ளனர். தனிப்பட்ட பகை காரணம் எனவும் , கொல்லப்பட்ட இளைஞனும் பல வன்முறைச் சம்பவங்களில் ஈடுபட்டவர் என்றும் பொலிஸார் தெரிவித்தனர்.
வெட்டுக் காயங்களுடன் ஐம்பது மீற்றர் தூரம் வரை ஓடிச் சென்று வர்த்தக நிலையம் ஒன்றின் முன்பாக குற்றுயிருடன் விழுந்து கிடந்தாக, சம்பவத்தை நேரில் கண்டவர்கள் கூறினர். சிசிரி கமராக்கள் மூலம் குற்றவாளிகள் விரைவில் கைது செய்யப்படுவர் என பொலிஸார் தெரிவித்தனர்.
