Tuesday, November 25, 2025 2:22 pm
பாகிஸ்தான் இன்டர்நேஷனல் ஏர்லைன்ஸின் (PIA) ஊழியர்கள் கனடாவிற்கு சென்று அங்கு மாயமாகி வருவதாக தகவல்கள் வெளியாகியுள்ளன.
PIA நிறுவனத்தின் மூத்த விமானப் பணிப்பெண்ணான ஆசிப் நஜாம், கடந்த நவம்பர் 16 ஆம் திகதி லாகூரிலிருந்து PK-789 விமானத்தில் டொராண்டோவிற்கு வந்தார். நவம்பர் 19 அன்று லாகூருக்கு திரும்பும் PK-798 விமானத்தில் அவர் பணிக்கு வரவில்லை.
கனடாவில் இந்த ஆண்டில் இத்துடன் 3 PIA நிறுவன ஊழியர்கள் இதே போல் மாயமாகியுள்ளனர். இதே போல் கடந்த 3 ஆண்டுகளில் 15 PIA நிறுவன ஊழியர்கள் கனடாவில் மாயமாகியுள்ளனர்.
பாகிஸ்தானில் நிலவும் பொருளாதார நெருக்கடி, குறைந்த சம்பளம் மற்றும் PIAவை தனியார் மயமாகும் முயற்சியால் வேலை பாதுகாப்பின்மை ஆகிய காரணங்களால் இதுபோன்ற சம்பவங்கள் நிகழ்வதாக கூறப்படுகிறது.
கனடாவில் அகதிகளுக்கான சட்டத்தில் உள்ள சலுகைகளை பயன்படுத்தி இந்த ஊழியர்கள் அங்கேயே தங்கி விடுவதாகவும் சந்தேகிக்கப்படுகிறது. விமான நிறுவன ஊழியர்களுக்கு மற்ற பயணிகளை போல் வழக்கமான விசா தேவைப்படுவதில்லை.
கடந்த சில ஆண்டுகளில் பாகிஸ்தான் உட்பட பல்வேறு நாடுகளில் இருந்து பல்வேறு காரணங்களுக்காக கனடாவில் புகலிடம் கோர விண்ணப்பிப்பது அதிகரித்துள்ளமை குறிப்பிடத்தக்கது.
