Saturday, October 3, 2026 8:05 am
மருந்து விலைகள் குறித்த வரவிருக்கும் திருத்தத்தின் கீழ், சில மருந்துகளின் விலைகள் அதிகரிக்கலாம் அல்லது சிலவற்றின் விலைகள் குறையலாம் என்று தேசிய மருந்துகள் ஒழுங்குமுறை ஆணையத்தின் தலைவர் டாக்டர் ஆனந்த விஜயவிக்ரம தெரிவித்தார்.
மருந்து விலை ஒழுங்குமுறை குறித்த விழிப்புணர்வை ஏற்படுத்துவதற்காகதேசிய மருந்துகள் ஒழுங்குமுறை ஆணையத்தில் நடைபெற்ற செய்தியாளர் சந்திப்பில் பேசிய அவர், கடந்த ஜூலை மாதம் வெளியிடப்பட்ட வர்த்தமானி அறிவிப்பைத் தொடர்ந்து, NMRA இப்போது அதிகபட்ச விலைக் கட்டுப்பாடுகளை மட்டும் நிர்ணயிப்பதற்குப் பதிலாக, ஒவ்வொரு குறிப்பிட்ட மருந்து பிராண்டிற்கும் விலையை நிர்ணயித்து வருவதாகக் கூறினார்.
174% கூடுதல் லாப வரம்பைக் கொண்ட, 30 ரூபாய் மதிப்புள்ள குழந்தைகளின் குடற்புழு நீக்க மருந்து ஒன்றை உதாரணமாகக் குறிப்பிட்ட அவர், சில நிறுவனங்கள் நியாயமற்ற லாபம் ஈட்டுவதாகவும், இந்த லாப வரம்பு மற்ற ஆசிய நாடுகளை விட மிக அதிகமாக இருப்பதாகவும் கூறினார்.
2016 ஆம் ஆண்டில் முதன்முதலில் 48 மருந்துகளுக்கு அதிகபட்ச விலைக் கட்டுப்பாடுகள் விதிக்கப்பட்டன. தற்போது பாராசிட்டமால் (Paracetamol) மற்றும் அமோக்ஸிசிலின் (Amoxicillin) ஆகியவற்றின் அனைத்து வணிகப் பிராண்டுகளுக்கும் விலைக் கட்டுப்பாடுகள் பொருந்தும்; முன்னதாக அதிக விலைக்கு விற்கப்பட்ட பிராண்டுகளின் விலைகள் குறைக்கப்பட வேண்டிய நிலை ஏற்பட்டது.
நீண்ட காலத்திற்கு உட்கொள்ளப்படும் மருந்துகள் இதில் அதிகம் பாதிக்கப்படும் என்று அவர் கூறினார். பல ஆண்டுகளாக உட்கொள்ளப்படும் ஒரு மருந்தின் மாதச் செலவு 900 ரூபாய் குறைந்தால், ஒரு நோயாளிக்கு ஆண்டுக்கு சுமார் 10,000 ரூபாய் சேமிப்பு கிடைக்கும்.
அதிகபட்ச சில்லறை விலை நிர்ணயிக்கப்பட்டுள்ளதால், ஒரு குறிப்பிட்ட பிராண்டின் விலை மாகாணங்கள் அல்லது நகரங்களுக்கு இடையே மாறுபடாது. இந்த விலைகள் தேசிய மருந்துகள் ஒழுங்குமுறை ஆணையத்தின் இணையதளத்தில் வெளியிடப்படும் என்றார்.
