Monday, June 15, 2026 9:09 pm
அமெரிக்காவின் பிலடெல்பியா நகரில் ஈக்வடோர், ஐவரிகோஸ் ஆகியவற்றுக்கிடையேயான போட்டியில் 90 ஆவது நிமிடத்தில் அமத் தியல்லோ அடித்த கோலால் ஈக்வடாரை 1-0 என்ற கணக்கில் வீழ்த்தி ஐவரி கோஸ்ட் வெற்றி பெற்றது.
ஆட்டத்தின் முதல் பாதியில் ஈக்வடார் அணி ஆதிக்கம் செலுத்தியது. 24வது நிமிடத்தில் ஜான் யெபோவாவும், 30வது நிமிடத்தில் ஆலன் மிண்டாவும் அடித்த பந்துகள் துரதிர்ஷ்டவசமாக கோல் போஸ்ட்டின் மேல் கம்பத்தில் பட்டுத் திரும்பின.
ஐவரி கோஸ்ட் அணியும் பதிலடி கொடுக்கத் தவறவில்லை. 2வது பாதியில் எலி வஹி அடித்த பந்து கம்பத்தில் பட்டுத் திரும்பியது. செகோ போபனா, பிராங்க் கெஸ்ஸி ஆகியோர் நடுகள ஆட்டத்தில் பலம் சேர்த்தனர். குறிப்பாக, இளம் வீரர் இயன் தியோமண்டே தனது அசுர வேக ஆட்டத்தால் ஈக்வடார் தற்காப்பு அரணுக்கு பெரும் சவால் அளித்தார். ஆர்சனல் டிபெண்டர் பியரோவை ஏமாற்றி அவர் பல கோல் வாய்ப்புகளை உருவாக்கினார்.
ஆட்டம் கோல் ஏதுமின்றி டிராவில் முடியும் என எதிர்பார்க்கப்பட்ட நிலையில், 90வது நிமிடத்தில் வில்பிரைட் சிங்கோ கொடுத்த அருமையான பாஸை பெற்றுக்கொண்ட மான்செஸ்டர் யுனைடெட் விங்கர் அமத் தியல்லோ, பந்தை லாவகமாக வளைத்து கோல் போஸ்ட்டிற்குள் அனுப்பி அணியை 1-0 என வெற்றி பெறச் செய்தார். இதனால் ஈக்வடார் ரசிகர்கள் அதிர்ச்சியில் உறைந்தனர்.
