Sunday, November 30, 2025 10:42 am
விதிகளை மீறி பகிடிவதை புரிந்த குற்றச்சாட்டில் யாழ்ப்பாணப் பல்கலைக்கழகத்தில் பயிலும் சிங்கள மாணவர்கள் 19 பேர் நேற்று சனிக்கிழமை பிற்பகல் கைது செய்யப்பட்டு விளக்கமறியலில் வைக்கப்பட்டுள்ளனர்.
19 மாணவர்களும் யாழ் மேலதிக நீதிவான் நீதிமன்றத்தில் நேற்று சனிக்கிழமை முன்னிலைப்படுத்தப்பட்டு, நீதிபதியின் உத்தரவின் பிரகாரம், எதிர்வரும் 3 ஆம் திகதி புதன்கிழமை வரை விளக்கமறியலில் வைக்கப்பட்டுள்ளனர்.
கடந்த 21 ஆம் திகதி பல்கலைக்கழக முகாமைத்துவ கற்கைகள் மற்றும் வணிக பீடத்தில் கல்வி பயிலும் சிங்கள சிரேஷ்ட மாணவர்கள், அதே பீடத்தில் கல்வி பயிலும் சிங்கள கனிஷ்ட மாணவர்கள் 15 பேரை தாக்கியுள்ளனர்.
குறிப்பாக பல்கலைக்கழக வளாகத்துக்கு வெளியே உள்ள வீடு ஒன்றில் வைத்து பகிடிவதை என்ற பெயரில் தாக்குதல் நடத்தியதாக கோப்பாய் பொலிஸாரிடம் முறைப்பாடு செய்யப்பட்டிருந்தது. பாதிக்கப்பட்ட மாணவர்கள் இந்த முறைப்பாட்டை செய்திருந்தனர்.
தாக்குதல் தொடர்பாக விசாரணை நடத்திய கோப்பாய் பொலிஸார், சம்மந்தப்பட்ட 19 மாணவர்களையும் கைது செய்தனர். நடத்தப்பட்ட விசாரணையில் அவரகள் குற்றத்தை ஒப்புக் கொண்டனர்.
இதன் பின்னரே 19 மாணவர்களும் நீதிமன்றத்தில் முன்னிலைப்படுத்தப்பட்டனர்
