Saturday, November 29, 2025 6:31 pm
தமிழர்கள் வாழும் வடக்கு கிழக்கு உள்ளிட்ட இலங்கைத்தீவு முழுவதும் பரவலான மின்சாரத் தடைகள் ஏற்பட்டுள்ளதாக இலங்கை மின்சார சபை தெரிவித்துள்ளது. ஏறத்தாள இரண்டு குடும்பங்கள் தற்போது மின்சாரம் இன்றி வாழ்வதாக பிரதிப் பொது முகாமையாளர் நோயல் பிரியந்த தெரிவித்தார்.
டித்வா புயல் காரணமாக மின்சார சபைக்கு பெரும் இழப்புகள் ஏற்பட்டுள்ளது என்றும் கூறிய அவர், மக்கள் நலன்களைக் கருத்தில் கொண்டு திருத்தப் பணிகளை ஆரம்பித்துள்ளதாகவும், ஆனாலும் பல சிரமங்கள் உள்ளதாகவும் சுட்டிக்காட்டினார்.
மின்சார சபையின் ஏழு மில்லியன் வாடிக்கையாளர்களில் சுமார் 25 வீதமானவர்கள் மின்சார செயலிழப்பை எதிர்கொள்வதாக பிரியந்த சுட்டிக்காட்டினார்.
மத்திய மாகாணத்தில் அதிக எண்ணிக்கையில் மின்சாரம் செயலிழந்துள்ளது. பதுளை மாவட்டம் மிகவும் பாதிக்கப்பட்ட இரண்டாவது இடத்தில் உள்ளது, தொலைத் தொடர்பு வசதிகளும் பாதிக்கப்பட்டுள்ளதால் முறைப்பாடுகளை எற்றுக் கொள்வதிலும் சிரமங்கள் ஏற்பட்டுள்ளன.
இருந்தாலும் திருத்தப் பணிகளுக்காக 9 ஆயிரம் ஊழியர்களைக் கொண்ட தொழில்நுட்பக் குழு நியமிக்கபபட்டுள்ளது. ஆனால் இடையூறுகளின் அளவு மற்றும் தற்போதைய வீதி நிலைமைகள் மின்சாரத்தை முழுமையாக திருத்தம் செய்வதற்கு அதிகளவு நேரம் எடுக்கும் என்று பிரியந்த மேலும் கூறினார்.
