Saturday, November 14, 2026 4:56 pm
உலகம் முழுவதும் உள்ள அரசாங்கங்கள், வணிகங்கள் , பொதுச் சேவைகளில் பரவலான இடையூறுகளை ஏற்படுத்திய ஒரு பெரிய செயலிழப்பிற்குப் பிறகு, தனது சேவை முழுமையாக மீட்டெடுக்கப்பட்டுவிட்டதாக மைக்ரோசொப் நிறுவனம் தெரிவித்துள்ளது .
பல ஆண்டுகளில் ஏற்பட்ட மிக மோசமான தகவல் தொழில்நுட்பக் கோளாறுகளில் ஒன்றால் பாதிக்கப்பட்ட மீதமுள்ள வாடிக்கையாளர்களுக்குச் சேவையை மீட்டெடுத்துவிட்டதாக அந்தத் தொழில்நுட்ப நிறுவனம் சனிக்கிழமை காலை தெரிவித்தது. அமெரிக்காவைச் சேர்ந்த அந்த நிறுவனம், தனது Microsoft 365 நிலவரப் பக்கத்தில், “இந்தச் சம்பவத்தின் அடிப்படைக் காரணத்தைக் கண்டறிந்து சரிசெய்வதற்கான எங்கள் முயற்சிகளை நாங்கள் நிறைவுசெய்து, பாதிக்கப்பட்ட மீதமுள்ள வாடிக்கையாளர்களுக்கும் பிராந்தியங்களுக்கும் சேவையை மீட்டெடுத்துள்ளோம்” என்று கூறியுள்ளது.
இந்தத் தடை பல இடங்களில் அரசாங்கங்கள், நீதிமன்றங்கள், சுகாதார சேவைகள், வணிக நிறுவனங்கள், விமான நிறுவனங்கள் வங்கிகள் ஆகியவற்றைப் பாதித்தது.. ஜப்பான், சிங்கப்பூர் ,அவுஸ்திரேலியா உள்ளிட்ட நாடுகளின் அரசாங்கங்கள், பல மணிநேரம் நீடித்த இந்த நிகழ்வு தங்களின் சில செயல்பாடுகளைப் பாதித்ததாகத் தெரிவித்தன.
ஐக்கிய ராச்சியத்தில் அத்தியாவசிய பொதுச் சேவைகள் பாதிக்கப்பட்டதால், மருத்துவமனை ஊழியர்கள் காகிதப் பதிவுகளைப் பயன்படுத்த வேண்டிய நிலைக்குத் தள்ளப்பட்டனர், மேலும் நீதிமன்றங்கள் தொலைநகல் இயந்திரங்களைத் தேடி அலைந்தன.
அவுட்லுக், டீம்ஸ் மற்றும் கோபைலட் என்ற செயற்கை நுண்ணறிவு உதவியாளர் உள்ளிட்ட மைக்ரோசாஃப்ட் 365 சேவைகள் தடைபட்டதாகப் பயனர்கள் தெரிவித்தனர். 70-க்கும் மேற்பட்ட நாடுகள் மற்றும் பிராந்தியங்களில் உள்ள பயனர்களிடமிருந்து செயலிழப்பு அறிக்கைகளைப் பெற்றதாக, டவுன்டிடெக்டர் என்ற ஒன்லைன் கண்காணிப்பு நிறுவனம் கூறியது.
