இஸ்ரேலுக்கும் ஹமாஸுக்கும் இடையில் போர் நிறுத்தத்தை ஏற்படுத்திய பின்னர் முதல்முறையாக இஸ்ரேல் புறப்பட்டார் அமெரிக்க ஜனாதிபதி டொனால்ட் ட்ரம்ப்.
இஸ்ரேலுக்கு புறப்பட்டபோது காசாவில் போர் முடிவுக்கு வந்ததாக அவர் கூறினார். அவர், எகிப்தில் உயர்மட்ட அமைதி உச்சிமாநாட்டிற்கு இணைத் தலைமை தாங்குவதற்கு முன்பு, நெசெட்டில் உரையாற்றுவார் என்று எதிர்பார்க்கப்படுகிறது.
“போர் முடிந்துவிட்டது, நீங்கள் அதைப் புரிந்துகொள்கிறீர்கள்” என்றுட்ரம்ப் செய்தியாளர்களிடம் கூறியதாக ராய்ட்டர்ஸ் தெரிவித்துள்ளது.
பிராந்தியத்தின் எதிர்காலம் குறித்து கேட்டபோது, ”அது இயல்பு நிலைக்குத் திரும்பும் என்று நான் நினைக்கிறேன்” என்று அவர் மேலும் கூறினார்.
இஸ்ரேல்-ஹமாஸ் போர் நிறுத்தத்தை ஏற்படுத்த உதவியதற்காக கட்டார் பெருமைப்பட வேண்டும் என்றும், பிரதமர் பெஞ்சமின் நெதன்யாகுவை பாராட்டுவதாக டிரம்ப் கூறினார்.
எதிர்பார்த்ததை விட சில பணயக்கைதிகள் முன்கூட்டியே விடுவிக்கப்படலாம் என்று அவர் கூறினார்.
மேலும் காஸாவின் மறுகட்டமைப்பை மேற்பார்வையிட விரைவில் ஒரு “அமைதி வாரியம்” அமைக்கப்படும் என்றும் கூறினார்.
“யூதராக இருந்தாலும் சரி, முஸ்லிம்களாக இருந்தாலும் சரி, அரபு நாடுகளாக இருந்தாலும் சரி, அனைவரும் மகிழ்ச்சியாக உள்ளனர். இஸ்ரேலுக்குப் பிறகு நாங்கள் எகிப்துக்குச் செல்கிறோம், மிகவும் சக்திவாய்ந்த மற்றும் பெரிய நாடுகள், மிகவும் பணக்கார நாடுகள் மற்றும் பிற நாடுகளின் தலைவர்கள் அனைவரையும் சந்திக்கப் போகிறோம், அவர்கள் அனைவரும் இந்த ஒப்பந்தத்தில் உள்ளனர்,” என்று அவர் மேலும் கூறினார்.
எகிப்தில் நடைபெறும் உச்சிமாநாட்டிற்கு ட்ரம்பும், எகிப்திய ஜனாதிபதி அப்தெல் ஃபத்தா எல்-சிசியும் இணைந்து தலைமை தாங்க உள்ளனர்.
அங்கு 20க்கும் மேற்பட்ட உலகத் தலைவர்கள் சமாதான ஒப்பந்தத்தின் கட்டமைப்பை இறுதி செய்யவும், போருக்குப் பிந்தைய காஸாவின் மறுகட்டமைப்பு குறித்து விவாதிக்கவும் கூடுவார்கள்.
ஐ.நா. பொதுச்செயலாளர் அன்டோனியோ குட்டெரெஸ், ஐரோப்பிய கவுன்சில் தலைவருடன், பிரான்ஸ், இங்கிலாந்து, இத்தாலி, துருக்கி, ஜோர்தான், சவூதி அரேபியா , இந்தியா உள்ளிட்ட நாடுகளின் தலைவர்கள் இதில் கலந்து கொள்கிறார்கள்.
