மோடியைப் புறக்கணிக்கும் கனடா

கனடாவில் நடைபெறவிருக்கும் ஜி7 உச்சி மாநாட்டில் இந்தியப் பிரதமர் நரேந்திர மோடி கலந்து கொள்ள மாட்டார் என்று அதிகாரப்பூர்வ வட்டாரங்களை மேற்கோள் காட்டி இந்திய ஊடகங்கள் செய்தி வெளியிட்டுள்ளன. புது தில்லிக்கும் ஒட்டாவாவிற்கும் இடையே நடந்து வரும் இராஜதந்திர பதட்டங்களுக்கு மத்தியில் இந்த முடிவு எடுக்கப்பட்டுள்ளது.
மோடியின் பங்கேற்பு குறித்து இரு தரப்பினரும் பேச்சுவார்த்தைகளைத் தொடங்கவில்லை என்றும், இந்த அளவிலான வருகை நடைபெறுவதற்கு முன்பு இருதரப்பு உறவில் குறிப்பிடத்தக்க முன்னேற்றம் தேவைப்படும் என்றும் இந்த விஷயத்தை நன்கு அறிந்த வட்டாரங்கள் தெரிவித்தன. கனடா சில நாடுகளுக்கு அழைப்பு விடுத்துள்ளது. இந்தியாவுக்கு அழைப்பு விடுக்கப்படவில்லை.
ஒரு வருகை பரிசீலிக்கப்பட வேண்டுமானால் பாதுகாப்பு கவலைகளும் கவனிக்கப்பட வேண்டியிருக்கும் என்று வட்டாரங்கள் தெரிவிக்கின்றன.
ஜூன் 15 முதல் 17 வரை ஆல்பர்ட்டாவின் கனனாஸ்கிஸில் நடைபெறவிருக்கும் ஜி7 உச்சிமாநாட்டை மோடி ஆறு ஆண்டுகளில் முதல் முறையாகத் தவிர்க்க வாய்ப்புள்ளது. 2022 ஆம் ஆண்டு பிரிட்டிஷ் கொலம்பியாவில் காலிஸ்தானி பிரிவினைவாதி ஹர்தீப் சிங் நிஜ்ஜார் கொல்லப்பட்டதிலிருந்து இந்தியா-கனடா உறவுகள் உறைபனியாகவே உள்ளன. சீக்கிய பிரிவினைவாதிகளை குறிவைக்கும் சதியில் ஈடுபட்டதாகக் கூறி, அதன் தூதரகத் தலைவர் உட்பட ஆறு இந்திய தூதர்களை கனடா கடந்த ஆண்டு வெளியேற்றியபோது பதட்டங்கள் அதிகரித்தன.
இந்தியாவின் பங்கேற்பு நிச்சயமற்ற நிலையில், தென்னாப்பிரிக்கா, உக்ரைன், அவுஸ்திரேலியா உள்ளிட்ட நாடுகள் தங்கள் வருகையை உறுதிப்படுத்தியுள்ளதாக கூறப்படுகிறது. இந்த உச்சிமாநாடு G7 நாடுகளான கனடா, பிரான்ஸ், ஜெர்மனி, இத்தாலி, ஜப்பான், இங்கிலாந்து , அமெரிக்கா ஆகிய நாடுகளின் தலைவர்களையும், ஐரோப்பிய ஆணையத்தின் தலைவர் , பல விருந்தினர் நாடுகளையும் ஒன்றிணைக்கும்.