Tuesday, February 4, 2025 6:06 pm
காலி, ஹினிதும, மகாபோதிவத்த பகுதியில் உள்ள விடுதி ஒன்றில் இடம்பெற்ற முக்கொலை சம்பவம் தொடர்பாக முன்னாள் அமைச்சரின் ஒருங்கிணைப்பு அதிகாரி ஒருவரை பொலிஸார் இன்று செவ்வாய்க்கிழமை (04) கைது செய்துள்ளனர்.
காலி ஹினிதும மஹாபோதிவத்த பகுதியில் கடந்த 30 ஆம் திகதி இரவு 11.15 மணியளவில் அடையாளம் தெரியாத துப்பாக்கிதாரியால் நடத்தப்பட்ட துப்பாக்கிச் சூட்டில் மூன்று பேர் கொல்லப்பட்டனர்.
மோட்டார் சைக்கிளில் வந்த இரண்டு பேரில் ஒருவர் T56 துப்பாக்கியால் துப்பாக்கிச் சூடு நடத்திவிட்டு தப்பிச் சென்றதாக பொலிஸார் தெரிவித்தனர்.துப்பாக்கிச் சூடு நடந்த நேரத்தில் ஐந்து பேர் விடுதியில் மது அருந்திக் கொண்டிருந்தனர், அவர்களில் மூன்று பேர் சம்பவ இடத்திலேயே உயிரிழந்தனர்.
துப்பாக்கிச் சூடு நடந்த நேரத்தில் மற்ற இருவரும் சம்பவ இடத்திலிருந்து தப்பிச் சென்றதாக பொலிஸார் தெரிவித்தனர்.
விடுதியின் உரிமையாளரான இந்துனில் சமன் குமார (வயது 55) , அம்பலாங்கொடையைச் சேர்ந்த எம். நெவில் மற்றும் ஹினிதும பகுதியைச் சேர்ந்த 34 வயதான சத்துரங்க குமார ஆகியோரே கொல்லப்பட்டனர்.
கொலை செய்யப்பட்ட மூன்று நபர்களுக்கும் பாதாள உலகத்துடன் எந்த தொடர்பும் இல்லை என்றும் பொலிஸார் தெரிவித்தனர்.
