கொழும்பிலும் அதைச் சுற்றியுள்ள பல பகுதிகளிலும் நேற்று வெள்ளிக்கிழமை (29) இரவு பலத்த காற்று வீசியதால், மரங்கள் முறிந்து விழுந்து போக்குவரத்து பாதிக்கப்பட்டது.
கொழும்பு-காலி வீதியில் கொள்ளுப்பிட்டிக்கும் வெள்ளவத்தைக்கும் இடையில் பெரிய மரங்கள் விழுந்துள்ளன. கிராண்ட்பாஸ் உட்பட நகரின் பிற பகுதிகளிலும் இதே போன்ற சம்பவங்கள் பதிவாகியுள்ளன.வீதியில் ஒரு பெரிய மரம் முறிந்து விழுந்ததில், அருகிலுள்ள குறைந்தது ஆறு வீடுகள் சேதமடைந்தன. உயிர் சேதம் எதுவும் ஏற்படவில்லை. வானிலை ஆய்வு மையம் அதன் சமீபத்திய முன்னறிவிப்பில், மேற்கு மற்றும் சப்ரகமுவ மாகாணங்களிலும், நுவரெலியா, கண்டி, காலி மற்றும் மாத்தறை மாவட்டங்களிலும் இன்று சில இடங்களில் 100 மில்லிமீட்டருக்கும் அதிகமான பலத்த மழை பெய்யக்கூடும் என்று தெரிவித்துள்ளது.
மத்திய மலைநாட்டின் மேற்கு சரிவுகளிலும், வடக்கு, வடமத்திய மற்றும் வடமேற்கு மாகாணங்களிலும், ஹம்பாந்தோட்டை மற்றும் திருகோணமலை மாவட்டங்களிலும் அவ்வப்போது மணிக்கு சுமார் (50-60) கி.மீ வேகத்தில் பலத்த காற்று வீசக்கூடும். நாட்டின் பிற பகுதிகளில் அவ்வப்போது மணிக்கு (30-40) கி.மீ வேகத்தில் ஓரளவு பலத்த காற்று வீசக்கூடும் என்று திணைக்களம் தெரிவித்துள்ளது.
