புதிய கல்வி சீர்திருத்தங்கள் மூலம் நடைமுறை ஆங்கில கற்பித்தல் அணுகுமுறைகளை செயல்படுத்த அரசாங்கம் தயாராக உள்ளது.
ஆங்கிலத்தை ஒரு மொழியாகக் கற்பிப்பது, சமூக ஏற்றத்தாழ்வுகளை உருவாக்கும் ஒரு கருவியாக அல்லாமல், வாய்ப்புகளை விரிவுபடுத்துவதற்கான ஒரு வழிமுறையாகச் செயல்பட வேண்டும் என்றும், வரவிருக்கும் கல்வி சீர்திருத்தங்கள் மூலம் நடைமுறை ஆங்கிலக் கற்பித்தல் அணுகுமுறைகளை செயல்படுத்த அரசாங்கம் தயாராக உள்ளது என்றும் பிரதமர் ஹரிணி அமரசூரிய தெரிவித்தார்.
ஜூன் 3 ஆம் திகதி கொழும்பில் பிரிட்டிஷ் கவுன்சில் ஏற்பாடு செய்திருந்த இலங்கை கல்வி மாநாடு 2025 இல் முக்கிய உரையை நிகழ்த்தும் போது பிரதமர் இந்தக் கருத்துக்களை தெரிவித்தார்.
அங்கு அவர் மேலும் தெரிவிக்கையில்,
தேசிய ,மாகாண அரசு அதிகாரிகள், கல்வி அமைச்சக பிரதிநிதிகள், மேம்பாட்டு பங்காளிகள், தனியார் துறை பங்குதாரர்கள், ஆசிரியர்கள் மற்றும் பள்ளித் தலைவர்களின் ஆதரவு அரசாங்கத்திற்குத் தேவைப்படுகிறது.
புதிய முயற்சியின் முதன்மையான குறிக்கோள், அனைத்து மாணவர்களுக்கும் வாய்ப்புகளை உருவாக்குதல், உள்ளடக்கிய தன்மையை வளர்ப்பது மற்றும் தரத்தை மேம்படுத்துவதன் மூலம் ஆங்கிலக் கல்விக்கான நியாயமான அணுகலை உறுதி செய்வதாகும். முக்கிய அம்சங்களில் ஆசிரியர்கள் மற்றும் நிறுவனங்களை மேம்படுத்துதல், ஆங்கில வழிக் கல்வியை வலுப்படுத்துதல் மற்றும் புதுமை மற்றும் கற்றலுக்கான டிஜிட்டல் கருவிகளை மேம்படுத்துதல் ஆகியவை அடங்கும்.
ஆங்கில மொழியைக் கற்றுக்கொள்வது, சமூக ஏற்றத்தாழ்வுகளுக்கு பங்களிக்கும் ஒரு வழியாக அல்லாமல், வாய்ப்புகளை விரிவுபடுத்தும் ஒரு வழியாக ஊக்குவிக்கப்பட வேண்டும். ஆங்கிலக் கல்விக்கான அணுகல் சமூக வர்க்கம், புவியியல் அல்லது குடும்பப் பின்னணியால் தீர்மானிக்கப்படாமல் இருப்பதை உறுதி செய்வது முக்கியம், மேலும் அனைவருக்கும் சமமான வாய்ப்புகள் வழங்கப்படுவதை உறுதி செய்ய வேண்டும்.
ஆங்கிலக் கல்விக்கான தேவை அதிகரித்து வருவதால், ஆங்கில வழிப் பள்ளிகளின் எண்ணிக்கையை 825 இல் இருந்து குறைந்தது 1,000 ஆக விரிவுபடுத்த அரசாங்கம் இலக்கு வைத்துள்ளது. கூடுதலாக, இருமொழி ஆசிரியர்களின் எண்ணிக்கையை அதிகரிக்கவும், ஏற்கனவே பணியில் உள்ளவர்களுக்கு பயிற்சி அளிக்கவும் நடவடிக்கைகள் எடுக்கப்பட்டு வருகின்றன என்றார்.
