77வது சுதந்திர தினத்திற்கு எதிர்ப்பு தெரிவித்து காணாமல் ஆக்கப்பட்ட உறவுகள் சங்கத்தினரின் ஏற்பாட்டில் கிளிநொச்சி கந்தசுவாமி ஆலயத்துக்கு முன்பாக ஆரம்பிக்கப்பட்ட ஆர்ப்பாட்டப் பேரணி கிளிநொச்சிச்சி பழைய கச்சேரி வரை முன்னெடுக்கப்பட்டது.
இப்போராட்டத்தில் பாராளுமன்ற உறுப்பினர் சிவஞானம் ஸ்ரீதரன் மற்றும் கஜேந்திரகுமார் பொன்னம்பலம் முன்னாள் பாராளுமன்ற உறுப்பினர்களான செல்வராசா கஜேந்திரன் சிவாஜிலிங்கம் உள்ளிட்ட அரசியல் பிரமுகர்கள் சிவில் அமைப்புக்களின் பிரதிநிதிகள் காணாமல் ஆக்கப்பட்டவர்களின் உறவுகள் எனப் பலரும் கலந்து கொண்டனர்.
முன்னெடுக்கப்பட்ட இந்த போராட்டத்தில் வலிந்து காணாமல் ஆக்கப்பட்டோருக்கு சர்வதேச நீதி வழங்குதல், தமிழ் அரசியல் கைதிகளை உடனடியாக விடுதலை செய்தல், தமிழர் தாயக பிரதேசத்தில் தொடர்ச்சியாக நடந்து வரும் நில அபகரிப்பு உடனே நிறுத்தப்பட வேண்டும், தமிழர் தாயக பிரதேசத்தில் இருந்து ராணுவம் வெளியேற்றப்பட வேண்டும், தமிழின படுகொலைக்கு சர்வதேச நீதி விசாரணை வேண்டும் என்ற கோரிக்கைகளை வலியுறுத்தி போராட்டமானது முன்னெடுக்கப்பட்டது.
