Saturday, November 29, 2025 11:10 pm
இலங்கைத்தீவில் ஏற்பட்டுள்ள சீரற்ற காலநிலை காரணமாக பொது அவசரகால நிலை பிரகடனப்படுத்தப்பட்டுள்ளது. இது தொடர்பாக இன்று சனிக்கிழமை ஜனாதிபதி அநுரகுமார திஸாநாயக்கா கையொப்பமிட்ட அதிவிசேட வர்த்தமானி வெளியிடப்பட்டுள்ளது.
நேற்று வெள்ளிக்கிழமை முதல் அமுலுக்கு வரும் வகையில், வர்த்தமானி அறிவித்தலை ஜனாதிபதி வெளியிட்டுள்ளார்.
வர்த்தமானியின் திருத்தங்களின் அமைவாக அதிகாரங்களைப் பயன்படுத்தி, இலங்கை முழுவதும் அவசரகால விதிமுறைகளை செயல்படுத்த அரசாங்கத்திற்கு முழு அதிகாரம் வழங்கப்படுகிறது.
மீட்பு பணி உள்ளிட்ட பொதுப் பாதுகாப்பு, இயல்பான செயற்பாடுகள் போன்றவற்றை உறுதி செய்வதற்கும், பொது வாழ்க்கைக்கு அவசியமான பொருட்கள் மற்றும் சேவைகளைப் பராமரிக்கும் நோக்கிலும் அவசரகால நிலை பிரகடனப்படுத்தப்பட்டுள்ளது.
இந்த வர்த்தமானி அறிவித்தலின் பிராகரம், மின்சாரம் வழங்கல் தொடர்பான சேவைகள், எரிபொருள் மற்றும் எரிவாயு விநியோகம், பொருட்களை கொண்டு செல்லல், வைத்தியசாலைகள், வைத்திய சேவைகள் வழங்கும் அனைத்து நிறுவனங்களும் பணியில் ஈடுபடுதல். மற்றும் போக்குவரத்து, நீர்வழங்கல் ஆகிய சேவைகள் உள்ளடங்குகின்றன.
குறிப்பாக அத்தியாவசிய சேவைகள் வழங்கல் மற்றும் அது தொடர்பான அனைத்தும் விடயங்கள் பற்றியும் அரச இயந்திரத்துக்கு அனைத்து அதிகாரங்களும் வழங்கப்பட்டுள்ளன.
இதேவேளை, உயிாிழந்தவர்களின் எண்ணிக்கை சுமார் 300 ஆக இருக்கலாமென அதிகாரிகள் நம்புகின்றனர். முழுமையான மதிப்பீடுகள் மேற்கொள்ளப்பட்ட பின்னரே உயிரிழப்புகள் மற்றும் சேதங்கள் பற்றிய விபரங்கள் வெளிவரும் எனவும் அதிகாரிகள் கூறுகின்றனர்.
உயிரிழப்புகள் பொருட் சேதங்கள் பற்றிய அதிகாரபூர்வமான அரசாங்க அறிக்கை இதுவரை வெளியாகவில்லை என்பது குறிப்பிடத்தக்கது.
