Monday, November 24, 2025 11:37 am
இந்தியாவின் மிகவும் பிரபல்யமான ஒரு தொலைக்காட்சியாக சீ தமிழ் தொலைக்காட்சி காணப்படுகின்றது. இந்த தொலைக்காட்சியில் ஒளிபரப்பாகும் ஒரு குறிப்பிடத்தக்க நிகழ்ச்சியாக “சரிகமப” இசை நிகழ்ச்சியை குறிப்பிடலாம்.
இந்தியாவின் தமிழ் நாட்டில் மட்டுமல்லாது இந்தியாவின் பிற பகுதிகளிலிருந்தும், ஏனைய நாடுகளிலிருந்தும் இந்த இசை நிகழ்ச்சியில் போட்டியாளர்கள் பங்குபற்றுவது வழக்கமான ஒன்றாகும். சரிகமப இசை நிகழ்ச்சிக்கு பார்வையாளர்களும் வெறுமனே இந்தியாவை மட்டும் கொண்டில்லாமல் உலகின் பெருமளவான பகுதிகளிலிருந்து இந்த இசை நிகழ்ச்சியை விரும்பி பார்வையிடுகின்றனர்.
இவ்வாறாக சீ தமிழில் ஒளிபரப்பாகிவரும் சரிகமப இசை நிகழ்ச்சியின் இறுதி சுற்று நேற்று நடைபெற்றது. சுசந்திகா, சபேசன், சிவானி, பவித்ரா, சிறீகரி ரவிந்திரன், சின்னு செந்தமிழன் என மொத்தம் 6 பேர் இறுதி சுற்றில் தமது பாடல் திறமையை வெளிக்காட்டியிருந்தனர்.
இந்த நிலையில் நேற்று நடைபெற்ற சரிகமப இறுதிச்சுற்றில் வெற்றியாளராக சுசாந்திகா தேர்ந்தெடுக்கப்பட்டார். அவருக்கு 60 லட்சம் ரூபாய் மதிப்புள்ள புதிய வீடு பரிசாக வழங்கப்பட்டது.
இலங்கையின் அம்பாறை மாவட்டத்தில் விநாயகபுரத்தைச் சேர்ந்த பாடகரான சுகிர்தராஜா சபேசன் இரண்டாம் இடத்தை பெற்றுள்ளார். சபேசனுக்கு 10 லட்சம் ரூபாய் பணப்பரிசு வழங்கப்பட்டுள்ளது.
மூன்றாம் இடத்தை பெற்ற சின்னு செந்தமிழனுக்கு 3 லட்சம் ரூபாய் மதிப்புள்ள தங்கம் பரிசாக வழங்கப்பட்டது. அதுமட்டுமன்றி ரசிகர் ஒருவர் அவருக்கு மோட்டார் சைக்கிள் ஒன்றை பரிசாக அனுப்பி இருந்தார்.
இதேவேளை கோல்டன் வாய்ஸ் என மக்களால் தேர்வு செய்யப்பட்ட பவித்ராவுக்கு 5 லட்சம் மதிப்புள்ள தங்கம் பரிசாக வழங்கப்பட்டது.
இலங்கையில் இருந்து சென்று தனது திறமையால் மிகப்பெரிய இசைமேடையில் இரண்டாம் இடத்தை பெற்ற சபேசனுக்கு சமூக ஊடகங்களில் இலங்கை வாழ் மக்களும், புலம்பெயர் உறவுகள் என பலரும் தமது வாழ்த்துக்களை தெரிவித்து வருகின்றனர்.
சரிகமப விட்டில் சாம்ப் சீசன் 3இல் இலங்கையின் யாழ்ப்பாணத்தைச் சேர்ந்த கில்மிசா வெற்றியாளராக தெரிவு செய்யப்பட்டிருந்தமை குறிப்பிடத்தக்கதொன்றாகும்.
