Sunday, November 16, 2025 6:58 pm
குறிப்பிடத்தக்க மட்டுப்படுத்தப்பட்ட பொருளாதார முன்னேற்றம் உண்டு. ஆனால் ஊழலுக்கு எதிரான அரசாங்கத்தின் நிலைப்பாடு ஏற்கக் கூடியது என பீல்ட் மார்ஷல் சரத் பொன்சேகா தெரிவித்துள்ளார்.
அநுர அரசாங்கத்தின் வழிகாட்டுதல் குறித்து தாம் மகிழ்ச்சியடைவதாகவும் சரத் பொன்சேகா ஊடகங்களிடம் கூறினார். பிரதான எதிர்க்கட்சிகள் எதிர்வரும் 21 ஆம் திகதி நடத்தவுள்ள அரச எதிர்ப்பு ஆர்ப்பாட்டத்தில் தான் பங்குகொள்ளப் போவதில்லை எனவும் அவர் சொன்னார்.
பொருளாதாரம் பெரிய மாற்றத்தை காணவில்லை என்றாலும், ஊழலை கட்டுப்படுத்தும் அரசாங்கத்தின் கொள்கைகள் மற்றும் குற்றச் செயல்களில் ஈடுபட்ட நபர்களை பாதுகாக்க அரசாங்கம் மறுப்பதை தான் பாராட்டுவதாகவும் தெரிவித்தார்.
முன்னர் ஆளும் கட்சியாக இருந்த, தற்போதைய எதிர்க்கட்சிகள், இந்த அரசாங்கத்தை எதிர்க்கத் தகுதி அற்றவர்கள் என்ற தொனியை சரத் பொன்சேகா வெளிப்படுத்தினார். இவர்கள் விட்ட தவறுகள் தான், ஊழல் மோசடி அதிகாரத் துஸ்பிரயோகம் போன்ற குற்றச் செயல்களுக்கு பிரதான காரணம் எனவும் சரத் பொன்சேகா சுட்டிக்காட்டினார்.
அதாவது, இந்த எதிர்க்கட்சிகள், ஆளும் கட்சியாக இருந்தபோது, நாட்டுக்குச் சாதகமான பங்களிப்பை வழங்கவில்லை என்பதை பொன்சேகா வெளிப்படுத்தினார்.
நவம்பர் 21 பேரணியை ஏற்பாடு செய்யும் எதிர்க்கட்சிகள் தேசத்தை 75 ஆண்டுகளாக பின்னுக்குத் தள்ளுவதற்குக் காரணமானவர்கள் என்றும் இப்போது அவர்கள் அநுர அரசாங்கம் பற்றி கதைகள் மூலம் மக்கள் மீண்டும் தவறாக வழிநடத்தப்படும் ஆபத்து எழும் எனவும் சரத் பொன்சேகா குறிப்பிட்டார்.
