Friday, March 20, 2026 2:12 pm
முன்னணி நிறுவனமான மெட்டா, பேஸ்புக் படைப்பாளர்களுக்காக ஒரு சிறப்பான அறிவிப்பை வெளியிட்டுள்ளது.
‘படைப்பாளர் விரைவுப் பாதை’ (Creator Fast Track) என்ற புதிய திட்டத்தின் கீழ், தகுதியுள்ளவர்களுக்கு மாதம் 3,000 டொலர்கள் (சுமார் 9.2 லட்சம் ரூபாய்) வரை வருமானத்தை அந்த நிறுவனம் உறுதி செய்துள்ளது.
இந்தத் திட்டம் ஏற்கனவே மக்கள் மத்தியில் செல்வாக்கு பெற்ற படைப்பாளர்களை மையப்படுத்தித் தொடங்கப்பட்டுள்ளது. தகுதியுள்ள படைப்பாளர்களுக்குத் தொடர்ந்து மூன்று மாதங்களுக்கு நிலையான வருமானம் வழங்கப்படும்.
நீங்கள் பதிவிடும் குறுங்காணொளிகள் அதிகப்படியான மக்களைச் சென்றடைய சிறப்பு முன்னுரிமை அளிக்கப்படும். இன்ஸ்டாகிராம், டிக்டொக் அல்லது யூடியூப் போன்ற தளங்களில் 10 லட்சத்திற்கும் அதிகமானப் பின்தொடர்பாளர்களைக் கொண்டவர்கள் மாதம் 3,000 டொலர் வரை ஈட்டலாம். குறைந்தபட்சம் 1 லட்சம் பின்தொடர்பாளர்களைக் கொண்டவர்கள் மாதம் 1,000 டொலர்கள் வரை ஈட்ட முடியும்.
“இத்திட்டத்தில் இணையும் படைப்பாளர்களுக்கு பேஸ்புக்கின் ‘உள்ளடக்க வருவாய் ஈட்டும் கருவிகள்’ உடனடியாக வழங்கப்படுகின்றன. இதன் மூலம் இந்தத் தொடக்கக் காலம் முடிந்த பிறகும் அவர்கள் தொடர்ந்து வருமானம் ஈட்ட வழிவகை செய்யப்பட்டுள்ளது.
கடந்த 2025 ஆம் ஆண்டில் மட்டும் மெட்டா நிறுவனம் சுமார் 3 பில்லியன் டொலர்களைப் படைப்பாளர்களுக்கு ஊதியமாக வழங்கியுள்ளது. இது முந்தைய ஆண்டை விட 35 வீதம் அதிகமாகும்.
படைப்பாளர்கள் தங்களின் வருமானத்தை எளிதாகக் கண்காணிக்க, தகுதியுள்ள பார்வைகள் மற்றும் வருவாய் விகிதம் போன்ற புதிய அளவீட்டு முறைகளையும் மெட்டா அறிமுகப்படுத்தியுள்ளது. இதன் மூலம் படைப்பாளர்கள் தங்கள் வளர்ச்சியைத் துல்லியமாக அறிந்து கொள்ள முடியும் என மெட்டா நிறுவனம் தெரிவித்துள்ளது.
