Saturday, November 29, 2025 9:04 pm
இலங்கைத்தீவில் டித்வா புயல் காரணமாக ஏற்பட்டுள்ள வெள்ளம், மண்சரிவுகளில் சிக்குண்டுள்ள மக்களை மீட்கும் பணியில் இந்திய ஹெலிகொப்டர்கள் ஈடுபட்டுள்ளன. இலங்கைக்கு தேவையான மீட்பு நடவடிக்கைகள் மற்றும் நிவாரண உதவிகள் வழங்கும் திட்டங்களை இந்திய வெளியுறவு அமைச்சு இன்று சனிக்கிழமை ஆரம்பித்துள்ளதாக வெளியுறவுத்துறை அமைச்சர் எஸ்.ஜெய்சங்கர் சமூக ஊடகத்தில் தெரிவித்துள்ளார்.
இந்திய வெளியுறவு கொள்கைக்கு அமைவாக இந்திய – இலங்கை விமானப்படையினர் இணைந்து மீட்பு பணிகளில் ஈடுபடுவதாக அமைச்சர் தனது பதிவில் குறிப்பிட்டுள்ளார்.
சீரற்ற காலநிலையினால் பாதிக்கப்பட்ட மக்களை காப்பாற்றும் நோக்கில் இந்திய மத்திய அரசினால் ஆரம்பிக்கப்பட்ட “ஒபரேஷன் சாகர் பந்து” (Operation Sagar Bandhu) என்ற திட்டத்தின் ஒரு பகுதியாக, விமானம் தாங்கி கப்பல் (Indian Navy’s aircraft carrier -INS) விக்ராந்திலிருந்து இரண்டு சேத்தக் வகை ஹெலிகொப்டர்கள் இலங்கை விமானப்படையுடன் இணைந்து முதல் கட்டமாக மீட்பு நடவடிக்கைகளை ஆரம்பித்துள்ளன.
இந்த இரண்டு ஹெலிகொப்டர்களும் மண்சரிவில் சிக்கியுள்ள மக்களை தேடும் பணிகளிலும் ஈடுபட்டுள்ளதாக தெரிவிக்கப்பட்டுள்ளது.
