Friday, November 28, 2025 10:06 am
வடக்கு, கிழக்கு உள்ளிட்ட தமிழர் தாயகப் பகுதிகளில் நேற்று வியாழக்கிழமை மாவீரர் நாள் நினைவேந்தல் நிகழ்வுகள் கடும்மழையின் மத்தியிலும் பெருமளவான மக்களின் பங்குபற்றுதலுடன் உணர்வுபூர்வமாக அனுஸ்டிக்கப்பட்டது.
சீரற்ற காலநிலை காணப்பட்டபோதிலும் அதனை பொருட்படுத்தாது சிறுவர்கள், முதியவர்கள் உட்பட பெருமளவான மக்களின் பங்குபற்றுதலுடன் நிகழ்வு அனுஸ்டிக்கப்பட்டது.
யாழ்ப்பாணம், தீவகம் சாட்டி துயிலுமில்லத்தில் இடம்பெற்ற மாவீரர் நாள் நினைவேந்தலில் மூன்று மாவீரர்களின் தந்தையான செல்லர் அருளம்பலம் பொது சுடரினை ஏற்றி வைத்தார்.
யாழ்ப்பாணம், கொடிகாமம் துயிலுமில்லத்தின் முன்பாக இடம்பெற்ற மாவீரர் நாள் நினைவேந்தலில் மாவீரர் மேரியனின் தாயான கந்தையா நாகராணி பொது சுடரினை ஏற்றி வைத்தார்.
யாழ்ப்பாணம் பல்கலைக்கழகத்தில் இடம்பெற்ற மாவீரர் நாள் நினைவேந்தல் நிகழ்வில் மாணவர்கள் மாவீரர்களுக்கு அஞ்சலி செலுத்தினர்.
யாழ்ப்பாணம், நல்லூர் மாவீரர் நினைவலையத்தில் இடம்பெற்ற மாவீரர் நாள் நினைவேந்தலில் மாவீரர் கப்டன் பண்டிதரின் தாயார் பொது சுடரினை ஏற்றி வைத்தார்.
யாழ்ப்பாணம், கோப்பாய் துயிலுமில்லத்தில் இடம்பெற்ற மாவீரர் நாள் நினைவேந்தலில் மூன்று மாவீரர்களின் தாயான நடேசு தவமணி பொது சுடரினை ஏற்றி வைத்தார்.
மூன்று மாவீரர்களின் தந்தை இரத்தினம் செல்ல தம்பி வடமராட்சி எள்ளம்குளம் மாவீரர் துயிலும் இல்லத்தில் பொதுச்சுடரை ஏற்றி வைத்தார்.
