Monday, November 24, 2025 1:34 pm
மக்கள் விடுதலை முன்னணியின் (JVP) பொதுச் செயலாளர் டில்வின் சில்வா பிரித்தானியாவுக்கு சுற்றுப் பயணமொன்றை மேற்கொண்ட நிலையில், அவருடைய வருகைக்கு எதிர்ப்பு தெரிவித்து பிரித்தானியா தமிழர் ஒருங்கிணைப்புக் குழுவின் ஏற்பாட்டில் போராட்டம் ஒன்று நேற்று ஞாயிற்றுக்கிழமை முன்னெடுக்கப்பட்டது.
டில்வின் சில்வா லண்டனுக்கு விஜயம் மேற்கொண்ட போது அங்கு கூட்டம் ஒன்று ஒழுங்கு செய்யப்பட்டிருந்தது. இந்த நிலையிலேயே டில்வின் சில்வாவுக்கு எதிராக தமிழர்கள் ஒன்று கூடி போராட்டத்தினை நடத்தியுள்ளனர்.
டில்வின் சில்வா கூட்டத்திற்குள் நுழைய முற்பட்ட போது இரு தரப்பினருக்கும் இடையே சலசலப்பு ஏற்பட்டுள்ளது. குறித்த இடத்தில் பொலிஸார் அதிகளவில் குவிக்கப்பட்டதாகவும், பாதுகாப்பு அதிகரிக்கப்பட்டதாகவும் தெரிவிக்கப்படுகின்றது.
தமிழர் தாயகத்தை இலக்காகக் கொண்ட ஆக்கிரமிப்பு நடவடிக்கைகளுக்கும், தமிழின அழிப்பை மறைக்கும் அரசியல் பொய்ப்பிரசாரத்திற்கும் எதிரான கோஷங்கள் போராட்டகாரர்களால் எழுப்பப்பட்டதுடன், தமிழின அழிப்பிற்கு எதிரான வாசகங்கள் பதித்த கண்டனப் பதாகைகளும் காட்சிபடுத்தப்பட்டன.
இந்த போராட்டத்தின் போது பிரித்தானியாவில் வாழும் ஈழத் தமிழர்கள் பெருமளவில் பங்கேற்று தமது அரசியல் நிலைப்பாட்டை வலியுறுத்தியிருந்தனர்.
