Monday, November 17, 2025 4:46 pm
பாதுகாப்பு காரணங்களுக்காகவே திருகோணமலையில் புத்தர் சிலை அகற்றப்பட்டதாக இன்று திங்கட்கிழமை பொதுமக்கள் பாதுகாப்பு அமைச்சர், ஆனந்த விஜேபால நாடாளுமன்றில் தெரிவித்த நிலையில் குறித்த புத்தர் சிலை மீண்டும் அதே இடத்தில் வைக்கப்பட்டுள்ளது.
திருகோணமலை கடற்கரை பகுதியில் ஏற்கனவே இருந்த புத்தர் சிலையுடன் சட்டவிரோதமான முறையில் கட்டுமாணம் மேற்கொள்ளப்பட்ட நிலையில், மக்களின் பாரிய போராட்டத்தின் பின் சிலை நேற்று இரவு அகற்றப்பட்டது.
கட்டுமானப் பணிகளைத் தற்காலிகமாக இடைநிறுத்துமாறு பொலிசார் உத்தரவிட்டனர். உத்தரவையும் மீறி நேற்று இரவு புத்தர் சிலை வைப்பதற்கான ஏற்பாடுகள் செய்யப்பட்ட நிலையில், அவ்விடத்துக்கு வந்த பொலிசார் சிலை வைக்கும் செயற்பாட்டை தடுத்ததனால் பிக்குகளுக்கும் பொலிசாருக்கும் இடையே முரண்பாடு ஏற்பட்டது.
இதன்போது பிக்கு ஒருவர் பொலிசாரின் கன்னத்தில் அறைந்ததை தொடர்ந்து அங்கு பதட்ட நிலை ஏற்பட்டது. தொடந்து பொலிசார் புத்தர் சிலையை அகற்றியிருந்தனர்.
இன்று காலை நாடாளுமன்றத்தில் இது தொடர்பில் கருத்து வெளியிட்ட பாதுகாப்பு அமைச்சர், ஆனந்த விஜேபால பாதுகாப்பு காரணங்களுக்காகவே புத்தர் சிலை அகற்றப்பட்டதாகவும், அதே இடத்தில் மீண்டும் சிலை வைக்கப்படும் என அமைச்சர் கூறியிருந்தார்.
