Tuesday, November 25, 2025 10:31 am
வடக்கு, கிழக்கு உட்பட்ட தமிழர் தாயகத்தின் வரலாற்றுத்தொன்மையினை மாற்றியமைக்கும் நோக்கில் மேற்கொள்ளப்படும் பௌத்த, சிங்கள பேரினவாத ஆக்கிரமிப்புக்களை அரசு உடன் நிறுத்தவேண்டும் என்ற தீர்மானம் தேசிய மக்கள் சக்தியின் கடும் எதிர்ப்பினையும் மீறி வலிகாமம் கிழக்குப் பிரதேச சபையில் நிறைவேற்றப்பட்டுள்ளது.
தவிசாளர் தியாகராஜா நிரோஷ் தலைமையில் வியாழக்கிழமை மாதாந்த அமர்வு நடைபெற்றது. இந்த அமர்வில் தமிழர் தாயகத்தில் அவர்களது இனவிகிதாசாரத்தினையும், வரலாற்றுத் தொன்மையினையும், அடையாளங்களினையும் மாற்றியமைக்கும் அனைத்து நடவடிக்கைகளையும் அரசு உடனடியாக நிறுத்தவேண்டும். அரசாங்கம் தமிழ் மக்களுக்கு நீதியை வழங்குவதாகத் தெரிவிக்கின்றபோதும் அது சிங்கள பேரினவாத நிகழ்ச்சி நிரலுக்குக் கட்டுப்பட்டதாக உள்ளது. அதனை நாம் வன்மையாகக் கண்டிக்கின்றோம் என தவிசாளரினால் தீர்மானம் முன்வைக்கப்பட்டது. மேலதிகமாக இவ் விடயம் தொடர்பில் அவசரதீர்மானம் மேற்கொள்ள வேண்டும் என உறுப்பினர் இ.கஜிபனினால் தவிசாளரிடம் கோரிக்கை ஒன்றும் சபையில் முன்வைக்கப்பட்டது.
தீர்மானத்தில் அரசாங்கம் பௌத்த, சிங்கள பேரினவாதத்தினை முன்னெடுக்கின்றது என்ற கருத்தினை நீக்கவேண்டும் என தேசிய மக்கள் சக்தியினர் கடுமையான வாதத்தில் ஈடுபட்டதுடன், சபையில் முன்வைக்கப்பட்ட இந்த தீர்மானத்திற்கு தாம் ஒருபோதும் ஆதரவு அளிக்க முடியாது என தேசியமக்கள் சக்தி உறுப்பினர்கள் கூட்டாக தவிசாளருடன் வாதிட்டனர்.
இந்நிலையில் பிரதேச சபையினைப் பிரதிநிதித்துவப்படுத்தும் தேசிய மக்கள் சக்தியை தவிர்ந்த ஏனைய கட்சிகளின் உறுப்பினர்கள் ஒருமித்து, அரசாங்கம் தமிழ் மக்களை ஏமாற்றக்கூடாது எனவும் தேசிய மக்கள் சக்தி அரசாங்கம் பௌத்த விகாரை விடயத்தில் நடந்துகொண்ட விடயத்தினை எதிர்த்தனர்.
திருகோணமலையில் சட்டவிரோதமான முறையில் அமைக்கப்பட்ட புத்தர் சிலை பொலிஸாரினால் அகற்றப்பட்டு பின்னர் மீளவும் அங்கு வைக்கப்பட்டமையும், நாடாளுமன்றத்தில் பாதுகாப்பு அமைச்சர் ஆனந்த விஜயபால “பாதுகாப்பு கருதி குறித்த சிலை அகற்றப்பட்டதாகவும், மீண்டும் சிலை வைக்கப்படும்” எனவும் தெரிவித்ததை சுட்டிக்காட்டி இது அரசாங்கத்தின் தலையீடு என தவிசாளர் தெரிவித்ததுடன் தேசிய மக்கள் சக்தி எதிர்த்தால் வாக்கெடுப்பின் ஊடாக தீர்மானம் பரிசீலிக்கப்படும் எனவும் கூறினார்.
தேசிய மக்கள் சக்தியினைப் பிரதிநிதித்துவப்படுத்தும் உறுப்பினர்கள் சபையில் இருந்து வெளிநடப்புச் செய்தனர். ஏனைய கட்சியை சேர்ந்த உறுப்பினர்கள் திருகோணமலையில் நடைபெற்றது தமிழ் மக்களுக்கு எதிரான பேரினவாத ஆக்கிரமிப்பு என பிரேரணையின் மீது கருத்துரைத்தனர்.
இந்நிலையில் தேசிய மக்கள் சக்தி தவிர்ந்த ஏனைய கட்சிகளின் பிரேரணையினை வலுப்படுத்தம் கவனயீர்ப்பு கருத்துக்களுடன் ஏகமனதாக தீர்மானம் நிறைவேற்றப்பட்டது.
