2019 ஈஸ்டர் ஞாயிறு குண்டுவெடிப்புக்குப் பின்னணியில் உள்ள மூளையாகச் செயல்படும் நபரை எதிர்கொள்ள இலங்கை சக்தியற்றது என்று முன்னாள் ஜனாதிபதி மைத்ரிபால சிறிசேன கூறினார். அந்த நபர் அரசாங்கங்கள், இராணுவம் , உளவுத்துறை ஆகியவற்றுக்கு நன்கு தெரிந்தவர் என்றும், ஆனால் அவரை அடைய முடியாது என்றும் அவர் கூறினார்.
இலங்கை அறக்கட்டளை நிறுவனத்தில் நடைபெற்றவைபவத்தில் உரையாற்றிய முன்னாள் ஜனாதிபதி, கொடிய தாக்குதல்களின் மூளையாகச் செயல்பட்டவரைக் கண்டுபிடிக்க அதிகாரிகள் துடித்துக் கொண்டிருந்தாலும், உண்மையை பொதுமக்களுக்கு எளிதில் வெளிப்படுத்த முடியாது என்று கூறினார்.
“அது எப்படி நடந்தது என்பது பற்றி நான் சிஐடியிடம் எல்லாவற்றையும் சொல்லிவிட்டேன். ஆனால் அதில் எதையும் பொதுமக்களுக்கு வெளியிட முடியாது. மூளையாகச் செயல்படுபவரைக் கண்டுபிடிக்க அனைவரும் துடிக்கிறார்கள், ஆனால் உண்மை என்னவென்றால் – அது யார் என்பது அவர்களுக்கு ஏற்கனவே தெரியும். ஒவ்வொரு அரசாங்கத்திற்கும், இராணுவத்திற்கும், உளவுத்துறைக்கும் தெரியும். மூளையாகச் செயல்படுபவர் எங்கே இருக்கிறார் என்பதை நாம் சொல்ல முடியும் என்றாலும், அவர்களை நாம் எதிர்கொள்ள முடியாது,” என்று சிறிசேன கூறினார்.
“கடுமையான குற்றங்கள் நடந்துள்ளன – சில வேண்டுமென்றே திட்டமிடப்பட்டன. இந்தத் திட்டங்கள் என்னை சேற்றில் தள்ளியது. எனது அரசாங்கத்தை நாசமாக்கி, எனது கட்சியை அழித்துவிட்டன,” என்று அவர் கூறினார்.
உலகத் தலைவர்களின் கேள்விக்குரிய மனநிலையால் உலக அமைதி மற்றும் நிலையான வளர்ச்சி அச்சுறுத்தலுக்கு உள்ளாகியுள்ளது என்றும் முன்னாள் ஜனாதிபதி கூறினார்.
“சில சக்திவாய்ந்த உலகத் தலைவர்கள் மனநலம் பாதிக்கப்பட்டவர்கள் – அவர்களால் போர் இல்லாமல் வாழ முடியாது. அவர்களுக்கு போர் மனநிலை இருக்கிறது. உதாரணமாக, நெதன்யாகு – அவர் எப்போதும் யாரையாவது தாக்க முயற்சிக்கிறார். முதலில் அது பாலஸ்தீனம், பின்னர் ஈரான். ஈரான் இஸ்ரேலைத் தாக்கியபோது, அமெரிக்கா தாக்குதல்களைத் தொடங்கியது. போருக்குச் செலவிடப்பட்ட அந்தப் பணம் அனைத்தும் உலகின் ஏழைகளுக்கு உதவப் பயன்படுத்தப்பட்டதா என்று கற்பனை செய்து பாருங்கள். 25 அல்லது 30 ஆண்டுகளுக்கு முன்பு நான் அமெரிக்காவுக்கும் , ஐரோப்பாவிற்குச் சென்றபோது, தெருக்களில் பிச்சைக்காரர்களைப் பார்த்ததில்லை. ஆனால் இப்போது, அவர்கள் எல்லா இடங்களிலும் உள்ளனர். இந்தப் போர் மனநிலைதான் இதற்கு வழிவகுத்தது – இது ஒரு உண்மையான பிரச்சனை,” என்று சிறிசேனா கருத்து தெரிவித்தார்.
